Azərbaycan, Bakı, 09 sentyabr / Trend , müxbir Ü.İsmayılova/ Azərbaycan Maliyyə Nazirliyinin ləğv etdiyi Azərbaycan-İran birgə sığorta şirkəti "Azer-Asia" oktyabrın 7-də təsisçilərin növbəti ümumi yığıncağını keçirəcək, - çərşənbə axşamı şirkətdən bildiriblər.
"Yığıncaqda öhdəliklərin yerinə yetirilməsi və potrfelin satılması üzrə konkret tədbilərin görülməsi məsələsi müzakirə ediləcək", - şirkətdən bildiriblər.
Sığorta fəaliyyəti ilə bağlı lisenziyanın ləğvindən sonra "Azer-Asia" təsisçiləri portfelin satılması haqqında mayda bəyan ediblər. Şirkətin 17 minə yaxın fiziki və 60 korporativ müştərisi var və onların hamısı polislərinin satışı haqqında məlumatlandırılıb. Şirkət öz potrfelini müqavilənin şərtlərini dəyişməyərək, digər yerli sığorta şirkətlərinə satmaq niyətindədir (bütün bağlanılmış sığorta polislərini).
Avqustda şirkət sığortaçılara və şirkət əməkdaşlarına borcların qaytarılması üçün öz təsisçilərindən 300 min manat tələb edib. Şirkətin kapitalında tərəflərin pay iştirakına uyğun olaraq, borcun 51 faizini azərbaycanlı təsisçi, 49 faizini isə İran tərəfi ödəyəcək.
Azərbaycan Maliyyə Nazirliyi fevralda "Azer-Asia" birgə sığorta şirkətinə 2002-ci il noyabrın 21-də verilmiş lisenziya fəaliyyətinə dair lisenziyanın müddətinin uzadılmasından imtina edib. Lisenziyanın uzadılmasından imtina edilməsinə əsas, şirkətin 2006-cı il oktyabrın 1-dən 2007-ci il oktyabrın 1-dək olan dövrdə sığorta qanunvericiliyinə və lisenziya tələblərinə uyğunluğunun yoxlanılmasının nəticələri olub. Yoxlamanın gedişində pozuntular aşkarlanıb.
İranın "Asiya Sıgorta" (49 faiz) və "AzərSığorta" (51 faiz) kommersiya şirkətinin təsisçiləri olduğu "Azər-Asiya" sığorta şirkəti Azərbaycanın sığorta bazarında 1997-ci ildən fəaliyyət göstərib.
