Azərbaycan, Bakı, 16 sentyabr/ Trend müxbir E.İsmayılov/ "Bakıda nəqliyyatın intellektual idarəetmə sisteminin yaradılması layihəsinin realizə dəyəri $55 mln.- dan $70 -75 mln.-dək arta bilər", - Azərbaycanın Nəqliyyat Nazirliyinin mətbuat xidmətinin rəhbəri Namiq Həsənov çərşənbə axşamı bildirib.
Layihənin mümkün bahalaşması əlavə işlərlə bağlı olacaq.
"Layihənin son dəyəri sentyabrın 30-da Bakıda keçiriləcək iclasın yekunları üzrə məlum olacaq", - Həsənov bildirib.
Azərbaycanın Nəqliyyat Nazirliyinin Nəqliyyat Siyasəti və İqtisadiyyat Şöbəsinin rəhbəri Sədrəddin Məmmədovun bir müddət əvvəl bildirdiyinə görə, Bakıda nəqliyyatın intellektual idarəetmə sisteminin yaradılmasına sentyabrın 30 - da start veriləcək. Layihədə podratçı qismində çıxış edən SK C& C şirkətinin vitse -prezidentinin başçılıq etdiyi Koreya nümayəndə heyəti Bakıya gələcək.
Nəqliyyat Nazirliyi ilə imzalanan sazişə əsasən, Bakıda Seul Şəhər Nəqliyyatı Mərkəzinə analoq olan Nəzarət Mərkəzi (dispetçerizasiya) yaradılacaq.
Birinci mərhələdə mərkəz Bakını, perspektivdə isə Abşeron yarımadasını əhatə edəcək.
Araşdırmalara əsasən, belə sistemin tətbiqi nəticəsində işıqfor və avtobus dayanacaqlarının sayı nizamlanacaq. Körpü və piyada keçidlərinin tikintisi nəticəsində onların sayı onsuz da azalıb.
Bu sistemin yaradılması avtonəqliyyat vasitələrinin hərəkəti, sürəti, dayanacaqlar, nəqliyyat qəzaları, tıxaclar və digər hallarda mərkəzi dispetçer məntəqəsinə operativ məlumat göndərməyə imkan verəcək.
Nəqliyyatın intellektual idarəsi sisteminin iki mərhələdə 3,5 il ərzində yaradılması nəzərdə tutulur.
Bakıda belə sistemin yaradılmasının məqsədi bir məntəqədən nəqliyyat sisteminin - sərnişin daşınmaları, avtomobil marşrutlarının, tıxacların təcridi və ləğvi, dayanacaqların idarə edilməsindən ibarətdir.
Müəlliflə əlaqə saxlamaq üçün elektron ünvan: [email protected]