...

2009-cu ildə Azərbaycanda ÜDM-in artımı 18 faizi ötəcək

Biznes və iqtisadiyyat xəbərləri Materials 24 Sentyabr 2008 15:17

Trend-i buradan izləyin

Azərbaycan, Bakı, 24 sentyabr / Trend , müxbir N.İsmayılova/ "2009-cu ildə Azərbaycanda ÜDM-in artım templərinin 18,9 faiz səviyyəsində olacağı proqnozlaşdırılır", - iqtisadi inkişaf naziri Heydər Babayev Nazirlər Kabinetində 2009-cu və növbəti üç ildə ölkənin makroiqtisadi proqnozlarının müzakirəsinə həsr olunmuş iclasda bildirib. Ümumi ÜDM istehsalının 43,6 mlrd. manat, orta aylıq əmək haqqının isə 353,3 manat səviyyəsində olacağı gözlənilir.

Gələn il əhalinin adambaşına düşən ÜDM-in $6300,8 və 2012-ci ildə 2007-ci illə müqayisədə iki dəfə artmaqla $7143 səviyyəsində olacağı gözlənilir.

Nazirin sözlərinə görə, 2009-cu ildə neft sektorunu üzrə artım 24,4 faiz, qeyri-neft sektoru üzrə artım isə 10,5 faiz səviyyəsində planlaşdırılır. Gələn il ölkə iqtisadiyyatına sərmayə yatırımları 8,4 mlrd. manat olacaq və bunun 6,5 mlrd. manatı daxili mənbələrin payına düşəcək. Vergi qanunvericiliyinin tətbiqi üzrə tədbirlərin həyata keçirilməsi və ölkə iqtisadiyyatının gələcək inkişafı nəticəsində büdcə gəlirlərinin artımı mümkün olacaq, - nazir hesab edir.

2009-cu ilin dövlət büdcəsinin proqnozlarını təqdim edən maliyyə naziri Samir Şərifov bildirib ki, ÜDM-də büdcə gəlirlərinin xüsusi çəkisi 27,9 faizə bərabərdir ki, bu da 2008-ci il üzrə proqnozdan 2,4 faiz çoxdur. Dövlət büdcəsinin gəlirləri 16,1 faiz artaraq 12 177 mln. manat səviyyəsində müəyyən edilib.

Büdcə xərclərinin xüsusi çəkisi 28,3 faiz səviyyəsində proqnozlaşdırılır (2008-ci ildən 1,4 faiz çox). Dövlət büdcəsinin xərcləri 12 355 mln. manat həcmində müəyyən edilib ki, bu da 2008-ci ilin proqnozlarını 1 294,4 mln. manat və ya 11,7 faiz qabaqlayır.

Xərclərn strukturunda 6655,5 mln. manat və ya 53,9 faiz cari xərclər, 5609,4 mln. manat (45,4 faiz) əsaslı xərclər, 90,1 mln. manat (0,7 faiz) isə kreditlərə xidmət göstərilməsi və faizlərin ödənilməsi üzrə xərclərin payına düşür.

Ümumi büdcə xərclərinin 33 faizi sosial yönümlü xərclər üçün nəzərdə tutulub. Cari illə müqayisədə sosial yönümlü xərclər 790 mln. manat və ya 24,4 faiz artacaq.

Maliyyə naziri ümumi büdcə haqqında məlumatlar barədə də məlumat verib. Bu məlumatlara əsasən, xəzinə gəlirlərinin 22 680,1 mln. manat, xərclərinin isə 14 758 mln. manat olacağı proqnozlaşdırılır.

Müzakirələrin yekunu üzrə dövlət büdcəsi layihəsini və makroiqtisadi proqnozları ölkə prezidentinə təqdim etmək barədə qərar qəbul edilib.

Sentyabrın 24-nə olan cari mübadilə məzənnəsi -- 0,8078 AZN/USD.

Müəlliflə əlaqə saxlamaq üçün elektron ünvan: [email protected]

Xəbər lenti

Xəbər lenti