Özbəkistan, Daşkənd, 17 oktyabr/ Trend , müxbirlər T.Jukov, Ü.İsmayılova/ Daşkənddə "İpək yolu ilə turizm" XIV Beynəlxalq Turizm Yarmarkası açılıb. Bu il Yarmarkada 23 ölkədən 117 şirkətin nümayəndəsi iştirak edir,- "Özbəkturizm" Milli Şirkətinin (MŞ) mətbuat xidmətindən Trend -a bildiriblər.
Əsas iştirakçı ölkələr aşağıdakılardır: Özbəkistan, Azərbaycan, Bolqarıstan, Vyetnam, Yunanıstan, Misir, İspaniya, Qazaxıstan, Kipr, Koreya, Qırğızıstan, Latviya, Malayziya, Birləşmiş Ərəb Əmirlikləri, Rusiya, Səudiyyə Ərəbistanı, Tacikistan, Türkmənistan, Türkiyə, Ukrayna və Çexiya.
"Özbəkturizm" MŞ-nin mətbuat xidmətindən bildiriblər ki, Azərbaycanı dörd turizm şirkəti təmsil edir.
""İpək yolu ilə turizm" XIV Beynəlxalq Turizm Yarmarkasının keçirilməsində əsas məqsəd dünya ictimaiyyətini Özbəkistanın turizm potensialı ilə tanış etmək, xarici turizm şirkətləri ilə əməkdaşlığın genişləndirilməsi və möhkəmləndirilməsidir", - "Özbəkturizm" MŞ-nin sədri Zahid Hakimov açılış mərasimində bildirib.
İkigünlük yarmarka çərçivəsində, şirkətlər arasında turistlərin Mərkəzi Asiya regionuna cəlb edilməsi üzrə təcrübə mübadiləsi aparılacaq. Birgə layihələrin realizəsini müzakirə etmək planlaşdırılır. Xarici turizm şirkətləri ilə əməkdaşlıq sazişi imzalanacaq.
2007 - ci ildə Özbəkistana gəlmiş xarici vətəndaşların sayı bir milyon nəfərdən çox olub, - "Özbəkturizm" MŞ-dən Trend -a bildiriblər. Hökumətin qəbul etdiyi xidmət və servis sahələrinin inkişafı üzrə Milli Proqrama əsasən, 2010 - cu ilə daxili və ölkəyə gələn turistlər üzrə axını ildə, orta hesabla, altı faiz artırmaq nəzərdə tutulub.
Müəlliflə əlaqə saxlamaq üçün elektron ünvan: [email protected]
