Azərbaycan, Bakı, 01 noyabr/ Trend , müxbir İ.Xəlilova/ Dünya bazarlarında USD/EUR-in məzənnəsindəki son dəyişmələr Azərbaycanın valyuta bazarına qısamüddətli təsir göstərir, - Azərbaycan Milli Bankı İdarə Heyətinin sədr müavini Rüfət Aslanlı bildirib. Oktyabrın 31-nə olan vəziyyətə görə, avronun məzənnəsi 1,2706 dollaradək azalıb.
"Son zamanlar bazarda dollar və avronun məzənnələri arasında böyük dəyişikliklər müşahidə edilsə də, Azərbaycan bazarının üstünlüyü ondan ibarətdir ki, bu dəyişmələr Azərbaycana təsir etmir", - Aslanlı bildirib.
Onun sözlərinə görə, məzənnədəki dəyişmələr sərmayədarlar və sahibkarların qarşılıqlı münasibətlərinə adekvat təsir göstərmir.
"İnsanlar əmanətlərini hansı valyutada saxlamağı, hansı valyuta ilə sərmayə yatırmağı və sabah üçün hansı tədbirlər görməyi bilmirlər. Daxili bazarda sabitlik müşahidə olunduğu üçün Azərbaycanda belə problemlər yoxdur. Lakin qısamüddətli dövrdə USD/EUR valyuta cütlüyündəki dəyişmələr cüzi də olsa Azərbaycan bazarına təsir göstərir", - İdarə Heyəti sədrinin müavini bildirib.
"Daxili valyuta bazarında qiymətlər tələb və təkliflə müəyyənləşir. Lakin ölkənin gəlirləri yüksək səviyyədə qalır və onların əsas hissəsi Azərbaycanın mal və xidmətlərinin ixracından daxil olmuş xarici valyutada formalaşdırılıb. Xarici valyutanın konvertasiyası üçün manat pul kütləsi tələb olunur və bu pul kütləsi çatışmadıqda xarici valyutanın məzənnəsi azalır", -Aslanlı bildirib.
"Digər tərəfdən, gəlirlər xarici valyutada formalaşdırıldığı üçün ölkə iqtisadiyyatı qlobal iqtisadiyyata inteqrasiya edir. Bununla yanaşı, valyutanın məzənnəsi Azərbaycanın iqtisadiyyatının xarici iqtisadiyyatlarla rəqabətqabiliyyətliliyinə təsir göstərir. Xaricdə bizim malların dəyəri baha olarsa, o zaman bu mallar satılmayacaq, ölkə bazarında idxal mallarının dəyəri aşağı olara, ölkə iqtisadiyyatına təzyiq göstərilir", - Aslanlı bildirib.
Bununla əlaqədar, AMB valyuta siyasətini müəyyənləşdirərkən valyuta paritetini diqqət mərkəzində saxlayır. Milli Bank, dünya maliyyə bazarlarındakı proseslərin fonunda mübadilə konsepsiyasını dəyişdirib və 2008-ci il martın 11-dən ABŞ dolları və avro tərkibli birvalyutalı səbətə qarşı Azərbaycan manatının dəyərinin dəstəklənməsi üzrə konsepsiya realizə edilir. Hazırda səbətdə valyutaların payı 30 faiz avronun 70 faiz dollara nisbətində müəyyən edilib.
AMB-nin qərarı artıq milli valyutanın ABŞ dollarına nisbətdə rəsmi mübadilə məzənnəsinin 4,2 faiz - ilin əvvəlindəki $1 görə 0,8453 manatdan oktyabrın 31-nə 0,8095 manatadək, həmçinin 16,8 faiz - 1 avroya görə 1,2448 manatdan 1,0361 manatadək möhkəmlənməsinə gətirib çıxarıb.
Son səkkiz il ərzində dolların
məzənnəsinə nisbətdə avronun
məzənnəsi artmaqda davam edib. Lakin 2008-ci ilin
payızında valyuta məzənnələri qrafikində divergensiya
baş verib və onun təsiri altında avronun kotirovkaları
düşməyə başlayıb. Avronun
məzənnəsinin kəskin düşməsi
nəticəsində məzənnə 1,335 dollar
səviyyəsində qərarlaşdı. Lakin azalma davam
etdikcə avronun məzənnəsi 2006-cı ildə
müşahidə edilmiş minimal həddədək - 1,25
dollar səviyyəsinə yaxınlaşdı.
Valyuta bazarında analoji vəziyyət 2005-ci ildə müşahidə edilib. Avronun məzənnəsi
o zaman da düşməyə başlasa da, tezliklə dolların məzənnəsinin artımı dayandı və avro üçün müsbət tendensiyalar yenidən üstünlüyü ələ aldı. Ekspertlər hesab edirlər ki, gələcəkdə avronun dollara nisbətdə mövqeyinin bərpası baş versə də, avronun məzənnəsinin dollara nisbətdə artımı daha az meylli kanalda gedəcək.
Müəlliflə əlaqə saxlamaq üçün elektron ünvan: [email protected]
