Azərbaycan, Bakı, 04 noyabr/ Trend , müxbir Ü.İsmayılova/ Gürcüstanın Müstəqil Dövlətlər Birliyindən (MDB) çıxması Azərbaycanla iqtisadi münasibətlərə və Azad Ticarət Zonası haqqında Saziş çərçivəsində həyata keçirilən ticarətə təsir göstərməyəcək, - Azərbaycanın Nazirlər Kabinetindən çərşənbə axşamı bildiriblər.
İl başa çatanda Gürcüstanın MDB çərçivəsində əvvəllər bağladığı bütün müqavilələr qüvvədən düşəcək.
"Bundan sonra Azərbaycan Gürcüstanla azad ticarət haqqında yeni ikitərəfli saziş bağlamaq niyyətindədir", - hökumətdən bildiriblər.
Gürcüstan parlamenti avqustun 14 - də yekdilliklə ölkənin MDB-də iştirakını müəyyənləşdirən müqavilələri ləğv edib. Gürcüstan de-fakto olaraq, Müstəqil Dövlətlər Birliyindən çıxıb.
Hökumətdən bildiriblər ki, Gürcüstanın MDB - nin tərkibindən çıxması heç bir şəkildə Azərbaycanla bağlı deyil və Tbilisinin Bakı ilə heç bir problemi yoxdur. Azərbaycan Gürcüstanla bütün sahələrdə əməkdaşlığını əvvəlki kimi davam etdirəcək.
MDB ölkələrinin mal, xidmət, kapital və işçi qüvvəsinin sərbəst hərəkəti ilə vahid iqtisadi məkan formalaşdırması Birlik dövlətlərinin azad ticarət zonasının yaradılması sahəsində əldə etdikləri razılıqlara əsasən həyata keçirilirdi.
2008 - ci ilin yanvar - avqustu ərzində Azərbaycan və Gürcüstan arasında xarici ticarət dövriyyəsi 355,8 mln. dollar təşkil edib. Ticarət dövriyyəsinin 35,8 mln. dolları idxal əməliyyatlarının payına düşür.
Müəlliflə əlaqə saxlamaq üçün elektron ünvan: [email protected]