Azərbaycan, Bakı, 25 noyabr / Trend , müxbir Ü.İsmayılova/ Maliyyə böhranı şəraitində Azərbaycanın maliyyə bazarında peşəkar aktuarların mövcudluğu iqtisadiyyatda sabitliyi təmin edə bilər, - aktuar işin öyrədilməsi üzrə kanadalı mütəxəssis Maykl Dzi hesab edir.
"Dünya maliyyə böhranı məhz ona görə baş verib ki, mütəxəssislər riskləri düzgün hesablamayıblar", - Dzi Bakıda söyləyib.
Onun sözlərinə görə, peşəkar və beynəlxalq səviyyədə tanınan aktuarlar sığorta maliyyə bazarının sabitliyini onun əsas tərkib hissələri - sığorta və təqaüd bazarı hesabına təmin edə bilərlər.
"Azərbaycanın sığorta bazarı məhz sığorta ehtiyatlarını və tarifləri düzgün hesablayacaq, maliyyə böhranı şəraitində təkcə sığorta bazarının deyil, həm də ümumilikdə ölkənin maliyyə bazarının minimal ziyanla çıxmasını təmin edə biləcək mütəxəssislərə ehtiyac duyur", - Dzi əlavə edib.
Bazar ertəsi Bakıda aktuar işin öyrədilməsinin birinci mərhələsinin ikinci kursu başa çatıb. Təlim Azərbaycan Maliyyə Nazirliyinin, Respubluka Sığortaçılar Assosiasiyasının və ABŞ-ın Beynəlxalq İnkişaf Agentliyinin (USAID) dəstəyi ilə keçirilib. Azərbaycanda bu kursları bitirən 13 aktuar beynəlxalq sertifikat alıb.
Müəlilflə əlaqə ünvanı: [email protected]
