Bakı. Trend:
ABŞ Prezidenti Donald Tramp və onun administrasiyasının səlahiyyət müddəti 2029-cu ilin yanvarında başa çatana qədər Kuba radikal dəyişikliklər yoluna qədəm qoyacaq.
Bu barədə ABŞ Dövlət katibi Marko Rubio deyib.
“Əminəm ki, bu administrasiyanın səlahiyyət müddəti başa çatana qədər Kuba tamamilə fərqli gələcəyə aparan yola qədəm qoyacaq”, - deyə o, ABŞ liderinin müşaviri Stiven Millerin həyat yoldaşı Keti Millerin avqustun 11-də yayımlanan podkastında bildirib.
ABŞ-ın xarici siyasət idarəsinin rəhbəri gözlənilən dəyişikliklərin təfərrüatlarını açıqlamayıb. Lakin siyasi kursun dəyişməsinə nümunə kimi Polşanı göstərib.
“Şərqi Avropa ölkələrinə bu gün tanıdığımız dövlətlərə çevrilmək üçün üç-beş il vaxt lazım oldu. Yəqin ki, Polşa bunun ən yaxşı nümunəsidir. Buna görə də hesab edirəm ki, Kuba da bu yola qədəm qoyacaq”, - deyə dövlət katibi bildirib.
