...

AYİB - in krediti Azərbaycanın müəssisəsinə mühüm regional yod istehsalçısı olmağa imkan verəcək

Biznes və iqtisadiyyat xəbərləri Materials 23 Dekabr 2008 20:50 (UTC +04:00)

Azərbaycan, Bakı, 23 dekabr/ Trend , müxbir N.İsmayılova/ Avropa Yenidənqurma və İnkişaf Bankı (AYİB) Azərbaycanın cənubunda yerləşmiş Azər -Yod MMC yod istehsalçısının müasirləşdirilməsi və genişləndirilməsi layihəsi üzrə kredit sazişi bağlayıb, - Avropa bankından çərşənbə axşamı bildiriblər. Bankın Direktorlar Şurası MMC-yə 15 mln. dollar məbləğində kreditin ayrılmasını təsdiqləyib.

Kredit, zavodun istehsal gücünün ildə 500 tonadək artırılması üçün yeni avadanlığın alınması, əlavə istehsalat xəttinin quraşdırılması və  təqribən 80   quyunun təmiri   üçün istifadə olunacaq. Azər-Yod MMC-nin uzunmüddətli strategiyası öz məhsulun mühüm bir hissəsini ixrac etməklə, regionun əhəmiyyətli yod istehsalçısına çevrilməkdən ibarətdir.

"Bu layihə AYİB - in Azərbaycanda yerli şirkətlərə etdiyi ən böyük sərmayələrindən biridir, - AYİB - in Bakı nümayəndəliyinin rəhbəri Frensis Deley bildirib. - Layihə bizim Azərbaycan üçün müəyyən etdiyimiz strategiyaya tam şəkildə uyğun gəlir, belə ki, ölkənin regionlarında qeyri - neft özəl sektorun inkişafını dəstəkləyir."

"Avropa bankının kreditinin köməyi ilə hasilat həcmlərini artıraraq və infrastrukturumuzu yeniləyərək, strategiyamızda müəyyən etdiyimiz kimi, regionda nüfuzlu yod istehsalçısı olmağı planlaşdırırıq", - Azər-Yod-un Baş direktoru İsgəndər Sadıqov deyib.

Hazırda Azərbaycanda yeganə yod istehsalçısı olan Azər-Yod bu məhsulu Azərbaycanın Neftçala rayonunda yerləşən yataqlardakı yodlu-bromlu lay sularından çıxarır. Kommersiya   baxımından mənfəətli olan yod mənbələri dünyanın az yerində var və bu ehtiyatların 60 faizi Çilidə cəmləşib. 2007- ci ildə dünyada yod istehsalının ümumi həcmi təqribən 28,000 ton təşkil edib.  

Bu gün Azər-Yod zavodunun ərazisi təxminən 17 ha təşkil edir. Ötən dövr ərzində əsas istehsal sahələri və yardımçı obyketlər bərpa edilib, onlarda yodlu - bromlu lay sularının emalı üçün ən müasir avadanlıq quraşdırılıb, xam materialların emalı üçün qabaqcıl texnologiyalar tətbiq edilib. Ötən ilin mayında zavodda havanın desorbsiyası yolu ilə yod istehsalı üzrə unikal avadanlıq quraşdırılıb. Yalnız birinci növbədə onun gücü ildə 50 ton təşkil edir və 94 faiz təmiz məhsul verir.

İstehsal tullantılarının təkrar emalı üçün zavodda quraşdırılmış avadanlıq atmosferin çirklənməsinin qarşısını almaqdan başqa, əlavə məhsul almaq imkanı verir.

Zavodun birinci növbəsi ildə təxminən 250 ton məhsul almağa hesablanıb və hazırda burada 200 - dən çox insan çalışır. Ümumilikdə müəssisənin ümumi layihə gücü ildə 500 ton yod təşkil edir. Bu məqsədə nail olmaq üçün sutkada 40 min kubmetr lay suyunu emala vurmaq lazımdır.

AYİB - in 8,5 mln. məbləğində birinci krediti istehsalın xammalla - lay suları ilə təmin edilməsi və ümumi sahəsi 550 ha olan yodlu - bromlu yataqların işlənilməsi məqsədilə ayrılmışdı.

Neftçala və Xıllıda təxminən 200 quyu öyrənilib, 140 quyu  istismara yararlı hesab edilib.

Zavodun birinci növbəsi çərçivəsində, üçüncü və dördüncü istehsal xətlərinin tikintisi nəzərdə tutulub. Istehsalın fasiləsiz elektrik enerjisi ilə təchizi üçün 8 MVt gücündə modul qaz generatorunun quraşdırılması planlaşdırılır.

Ümumdünya Səhiyyə Təşkilatının məlumatına görə, bu gün dünyada 1 milyarddan çox insan orqanizmdə yod çatışmazlığından əziyyət çəkir, 750 mln. insan zob diaqnozu ilə yaşayır, 43 mln. uşaq əqli inkişafdan geri qalır.

Müəlliflə əlaqə saxlamaq üçün elektron ünvan: [email protected]

Xəbər lenti

Xəbər lenti