Azərbaycan, Bakı, 21 yanvar/ Trend , müxbir N.İsmayılova / "Azərbaycanın Milli Bankı (AMB) pul - kredit siyasətinin yumşalmasını gözləyir", - AMB Idarə Heyətinin sədri Elman Rüstəmov deyib.
"Özü də yalnız pul - kredit və faiz siyasəti deyil, banklara kifayət qədər likvidliyin təmin olunması məqsədilə mütləq ehtiyat normasının yenidən maliyyələşdirməsi şərtləri də yüngülləşdiriləcək", - Rüstəmov qeyd edib.
Onun sözlərinə görə, pul - kredit siyasəyi artıq yetərincə yüngülləşdirilib, ancaq bazar şərtlərinə uyğunlaşmaq üçün bu siyasət davam etdiriləcək. Bu da kredit resurslarına daha tez çatmaq imkanı verəcək.
"Real sektor pul vəsaitlərinə ehtiyac duyur, ancaq bankların xarici kreditləri qaytarması likvidliyi azalda bilər. Buna görə də, xaricdən ölkə iqtisadiyyatının canlanmasına, məşğulluğun artırılmasına neqativ təsirin neytrallaşdırılması siyasəti həyata keçirilir", - deyə Rüstəmov əlavə edib.
Onun sözlərinə görə, iki il ərzində banklar xarici kreditləri ödəmək üçün təxminən 2,5 milyard dollar ödəməlidir. "Bu səbəbdən, biz, ən azı, bu vəsaitləri örtməliyik".
"İqtisadiyyatın maliyyələşdirilməsinə bir neçə milyard dollar xərclənəcək, çünki bir neçə yüz milyon dövlət maliyyələşdirmə porqramının həyata keçirilməsinə yetərli deyil", - AMB rəhbəri əlavə edib. "Bu proseslərin həyata keçirilməsi ən yaxın zamanda gözlənilir".
2008 - ci ilin 11 ayı ərzində banklar tərəfindən ölkə iqtisadiyyatına 6,86 milyard manat qoyulub. Onlarda 1,7 milyard manat ticarət və xidmət sektoruna, 812 milyon manat - energetika, kimya və təbii ehtiyatlar sektoruna, 258,7 milyon manat kənd təsərrüfatı və təkrar emal, 425,8 milyon manat tikinti və daşınmaz əmlak, 405,9 milyon manat sənaye və istehsal sektoru, 660,6 milyon manat nəqliyyat və rabitəyə yönəldilib.
Yanvarın 21-nə mübadilə məzənnəsi 0,8045 AZN/USD təşkil edir.
Məqalənin müəllifi ilə əlaqə ünvanı: [email protected]