Azərbaycan, Bakı, 22 yanvar / Trend , müxbir İ.Xəlilova/ Beynəlxalq Valyuta Fondu (BVF) respublikada vergi siyasətinin təkmilləşdirilməsində Azərbaycana istənilən köməyi göstərməyə hazırdır, - fondun dövlət sektorunun idarə edilməsi üzrə baş mütəxəssisi Münaver Xvaça ölkənin Vergilər Nazirliyində görüşdə bildirib.
O, Azərbaycanın vergi sistemini yüksək qiymətləndirib və ölkədə müasir vergi inzibatçılığının qurulmasına xüsusi diqqət ayırıb.
"Vergi sistemində islahatlarla yanaşı, vergi yığımlarına əngəl törədən maneələri aradan qaldırmaq lazımdır, - BVF-in mütəxəssisi bildirib. - Gəlir vergisinin ödənilməsindən yayınma halları ilə mübarizə aparmaq xüsusilə məqsədəuyğun olardı".
Xvaça Vergilər Nazirliyinə hesab-fakturaların yoxlanılması üzrə işi təkmilləşdirməyi tövsiyə edib.
Vergilər nazirinin müavini Natiq Əmirov BVF-in missiyasını büdcə gəlirlərinin yerinə yetirilməsi üzrə risklərin azaldılması məqsədilə bir sıra tədbirlərin keçirilməsi barədə məlumatlandırıb. O, həmçinin vurğulayıb ki, büdcə daxilolmalarının yığılması zamanı təmin olunmuş gəlirlərə üstünlük veriləcək. Onun sözlərinə görə, vergi orqanları əvvəlki illərdə olduğu kimi 2008-ci ildə də proqnoz göstərişlərini artıqlamasıyla yerinə yetiriblər.
Vergilər Nazirliyinin xətii ilə proqnoz 106,4 faiz yerinə yetirilib və 5,4 mlrd. manat proqnoza qarşı 5,75 mlrd. manat daxil olub. Ötən il yalnız fiziki şəxslərin gəlir vergisi üzrə proqnoz göstəriciləri yerinə yetirilməyib. Gəlir vergisi üzrə 637,8 mln. manat yığılıb ki, bu da proqnozlaşdırılan həcmdən 20,2 faiz azdır.
BVF-in ekspertləri son yeddi-səkkiz ildə vergi sistemində islahatların aparılması prosesində fəal iştirak ediblər və bu prosesdə onların tövsiyələri nəzərə alınıb. İslahatlar zamanı avtomatlaşdırılmış vergi informasiya sistemi vasitəsilə nazirliyin bütün strukturları ilə əlaqə təmin olunub. 2007-ci ildən ölkədə elektron bəyannamələr sisteminin tətbiqi başlayıb və qısa vaxt ərzində vergi ödəyicilərinin böyük bir hissəsi, o cümlədən ƏDV ödəyicilərinin 90 faizi bəyannamələri elektron formatda təqdim etməyə başlayıblar.
Hazırda Vergilər Nazirliyi vergi qanunvericiliyinin Avropa İttifaqının normaları ilə uyğun vəziyyətə gətirilməsi üzrə Dövlət Proqramını hazırlayır. Proqram 2009-2012-ci illərə nəzərdə tutulub. BVF-in ekspertləri proqram layihəsinin təkmilləşdirilməsi və onun uğurlu realizəsində də kömək göstərirlər.
Yanvarın 22-nə olan cari mübadilə məzənnəsi - 0,8044 AZN/USD təşkil edir.
Müəlliflə əlaqə saxlamaq üçün elektron ünvan: [email protected]
