Azərbaycan, Bakı, 03 fevral / Trend , müxbir İ.Xəlilova/ Alman İnkişaf Bankı KfW Azərbaycanda kiçik və orta sahibkarlığın (KOS) dəstəklənməsi üçün 5 milyon avro məbləğində üçüncü güzəştli kreditin təqdim edilməsi istiqamətində Azərbaycan hökuməti ilə danışıqları davam etdirir.
Bank yeni təkliflərlə çıxış edib və bu təkliflər əvvəllər olduğu kimi KOS-un maliyyələşdirilməsi üçün nəzərdə tutulsa da, artıq Almaniya-Azərbaycan Fondu (AAF) vasitəsilə realizə edilməyəcək, - KfW-in Bakı ofisinin rəhbəri Natiq Abdullayev çərşənbə axşamı bildirib.
Bankın ofisinin rəhbəri təkliflərin mahiyyətini açıqlamayıb.
İlkin olaraq əvvəlki iki kreditdə olduğu kimi bu vəsaitlərin bölünməsini də AAF vasitəsilə həyata keçirmək nəzərdə tutulurdu. Lakin banka vəsatilərin İqtisadi İnkişaf Nazirliyi yanında Sahibkarlığa Kömək Milli Fonduna (SKMF) yönəltmək imkanını nəzərdən keçirmək təklif olunub.
AAF vasitəsilə doqquz bank kreditləşdirildiyi halda, SKMF-in 29 səlahiyyətli kredit strukturu var.
"Lakin üçüncü kreditin vəsatilərinin Milli Fond vasitəsilə mənimsənilməsi artıq müzakirə olunmur. Belə ki, hazırda yalnız texniki yardım istənilir. KfW-in siyasətinə əsasən, texniki yardım sonrakı kredit dəstəyi olmadan təqdim edilə bilməz", - Abdullayev deyib.
İlk əvvəl KfW Azərbaycana sahibkarlığın inkişafı üçün 20 milyon avro məbləğində birləşdirilmiş kredit təklif edirdi. Bu kreditin 5 milyonunu əvvəllər olduğu kimi bankın özünün vəsatilərindən liberal şərtlərlə - 10 il ödəniş möhləti olmaqla 40 il müddətinə və illik 0,75 faiz dərəcə üzrə təqdim etmək nəzərdə tutulurdu. Kreditin qalan vəsaitləri (15 milyon avro) KfW tərəfindən kapital bazarında mənimsənilməlidir və buna görə də, burada şərtlər kommersiya xarakterli olmalıydı. Azərbaycan hökuməti güzəştli kreditin alınması barədə razılığa gələ bilməyərək, onun kommersiya hissəsindən imtina etdi.
1999-cu ildən Alman bankı AAF-a iki tranşla 8,7 milyon avro təqdim edib. Bu vəsaitlərin mənimsənilməsi artıq başa çatıb və hazırda banklar revolver hesabı və AAF-ın fəaliyyətə başladığı vaxtdan qazandığı mənfəət hesabına maliyyələşdirilir.
2001-ci ilin martından Bank of Baku və UniBank, 2003-cü ilin yanvarından Para Bank və Bank Respublika, 2004-cü ilin sentyabrından Azərdəmiryolbank və AG Bank, 2006-cı ilin dekabrından Rabitə Bank və Mugan Bank, 2007-ci ilin fevralından Nikoil Bank AAF-ın tərəfdaşlarıdır.
Müəlliflə əlaqə saxlamaq üçün elektron ünvan: [email protected]
