Azərbaycan, Lənkəran, 03 fevral / Trend , müxbir P.Əliyeva/ Azərbaycanın cənub regionunda - Lənkəranda daşınmaz əmlakın qiymətləri ötən ilin analoji dövrü ilə müqayisədə 30-35 faiz azalıb, - Elnur MMC regional riyeltor şirkətinin direktoru Mirzə Əliyev çərşənbə axşamı bildirib.
"Qiymətlərin aşağı düşməsinə baxmayaraq, son ay ərzində bazarda heç bir əmlakın alqı-satqısı əməliyyatı aparılmayıb", - Əliyev bildirib.
Onun sözlərinə görə, hazırda mikrorayon ərazisində bir otaqlı mənzil 20-25 min, 2-3 otaqlı mənzil 23 -35 min dollardır. Şəhərin mərkəzi hissəsində mənzillərin qiyməti ötən ildəki 60-70 min dollara qarşı 40-45 min dollaradək azalıb.
Əliyevin rəyinə görə, alıcılıq qabiliyyətinin azalması maliyyə böhranının təsiri ilə bağlıdır. Böhran nəticəsində banklar fəal surətdə borclulardan pulları tələb etməyə başlayıb, mənzil sahibləri isə onları real qiymətdən ucuz satmağa məcbur olublar.
Əvvəllər Lənkəranda daşınmaz əmlak obyektlərinin böyük hissəsini Rusiyada yaşayan azərbaycanlılar alırdılarsa, son beş-altı ay ərzində onlardan heç bir təklif daxil olmayıb.
Lənkəranda torpaq bazarında da qiymətlər aşağı düşüb. Ötən il torpağın 1 sotu yerindən asılı olaraq 1000-1500 dollara idisə, indi qiymət 600-1000 dollar civarında dəyişir.
"Güman edirəm ki, yaranmış vəziyyətlə əlaqədar yaxın aylarda qiymətlərin azalması davam edəcək", - Əliyev əlavə edib.
Müəlliflə əlaqə saxlamaq üçün elektron ünvan: [email protected]