Qazaxıstan, Astana, 10 fevral / Trend , müxbir K.Konırova/ "1997-ci ildə Asiya maliyyə böhranından çıxmış Cənubi Koreya öz təcrübəsini Qazaxıstanla bölüşməyə hazırdır", - Cənubi Koreyanın Qazaxıstandakı səfiri İl-Su Kim deyib.
"Ölkələrimizin iqtisadi inkişafında bir çox oxşar tərəflər mövcuddur. Cənubi Koreya öz iqtisadiyyatında müəyyən inkişafa nail olub. Qazaxıstan bu gün qarşısına bir vaxtlar Koreya xalqının qoyduğu yüksək vəzifələri qoyur", - səfir bildirib.
"1997-ci ildə Cənubi Koreya Asiya iqtisadi böhranını yaşayıb. Bu gün Qazaxıstan eyni sınaq qarşısındadır", - Kim hesab edir.
"Biz sizdə toplanmış imkanlardan səmərəli istifadə etməyiniz üçün malik olduğumuz böyük təcrübəni paylaşmağa hazırıq", - Kim vurğulayıb.
Koreya səfirliyi Astanada hər iki ölkənin aparıcı mütəxəssis və ekspertlərinin iştirakı ilə maliyyə siyasəti üzrə seminar təşkil edib. Yaxın zamanlarda səfirlik tikinti biznesi üzrə analoji seminar keçirmək niyyətindədir.
"Tikinti probleminin bu gün nə qədər aktual olduğunu bilirəm. Koreyanın bu sahədə böyük təcrübəsi var və biz bu sektoru bundan sonra necə inkişaf etdirməyi və tikinti şirkətlərinə böhrandan çıxmağın yollarını göstərə bilərik", - Kim qeyd edib.
Onun fikrincə, iki ölkə arasındakı əməkdaşlıq bir neçə istiqamətdə inkişaf edə bilər: kosmosun öyrənilməsi, infrastruktur obyektlərinin tikintisi, kənd təsərrüfatı və nəqliyyat sahələri üzrə.
Səfir "Kazaxstan Temirjolu" milli şirkətinin rəhbərliyi ilə görüşüb.
"Biz görüş zamanı bir neçə məsələni müzakirə etdik. Onlardan biri dəmir yollarında kommunikasiya və siqnalizasiya ilə bağlı proqram təminatının verilməsi idi. Bu sahədə bizim mütəxəssislərlə rəqabətə girmək mümkün deyil", - səfir bildirib.
Bundan başqa, o, Almatı və Astana arasında səfər edəcək sürət qatarlarının yığılması üzrə Koreya "nou-hau"sundan istifadə olunması təklifi ilə də çıxış edib. Səfirin sözlərinə görə, Qazaxıstan tərəfi bu təklifləri nəzərdən keçirir.
Diplomatın verdiyi məlumata görə, bu gün Cənubi Koreya öz kosmodromunu tikir və Qazaxıstanla kosmos sahəsində əməkdaşlıqda maraqlıdır. Səfir bu işlər üzərində səyləri birləşdirmək məqsədilə "Kazkosmos"un rəhbərliyi ilə də görüşüb.
Kimin sözlərinə görə, 2008-ci ildə Cənubi Koreya ilə Qazaxıstan arasında ticarət dövriyyəsi təxminən 800 milyon dollar təşkil edib. Cənubi Koreyanın Qazaxıstan iqtisadiyyatına yatırdığı sərmayələr iki milyard dolları ötüb.
Ölkələr arasında diplomatik münasibətlərin əsası 1992-ci ildə qoyulub. Bu gün Qazaxıstanın bank sektoru sahəsində, neft-qaz və uran hasilatı (Koreya uranın 25 faizini Qаzахıstandan idxal edir) sənayelərində Cənubi Koreya şirkətlərinə rast gəlmək mümkündür.
Məqalə müəllifi ilə əlaqə ünvanı: [email protected]
