Azərbaycan, Bakı, 26 fevral / Trend , müxbir N.İsmayılova / "2008-ci ildə 602 milyon avro həcmində çəkilən zərərdən sonra, Avropa Yenidənqurma və İnkişaf Bankı (AYİB) bu il dünya maliyyə böhranına birbaşa cavab olaraq Şərqi Avropa ölkələrinin iqtisadiyyatına kapital qoyuluşunu artırmağı planlaşdırır", - Bankın məlumatında deyilir.
AYİB-in 2007-ci ildəki xalis gəliri 1,9 milyard avro təşkil edib. 2008-ci ildəki kəsr, əsasən banka məxsus olan və dünya fond bazarının zəifləməsi ilə birlikdə düşən səhm paketlərinin həddindən artıq qiymətləndirilməsi nəticəsində yaranıb.
"Bu itkilər bankın sərmayə planlarına təsir etməyəcək, çünki AYİB-in kapitallaşması yetərincə möhkəm olaraq qalır. Bu il bank əməliyyatlar aparılan ölkələrə yeddi milyard dollara yaxın sərmayə qoymağı planlaşdırır. 2008-ci ildə bu rəqəm 5,1 milyard dollar olub", - bankın məlumatında deyilir.
AYİB tərəfindən maliiyə böhranının qarşısının alınması üçün görülən tədbirlər, ilk növbədə maliyyə sektorunun təcili tələblərinin ödənilməsinə yönəldilib. Bu etibarlı maliyyə institutlarının möhkəmləndirilməsinə yardım və öz maliyyə mənbəyindən məhrum olan kiçik və orta müəssisələrin (KOM) kreditləşdirilməsini dəstəkləmək üçün edilir.
Bankın son sərmayələri içərisində "Bank Qruzii", Ukraynanın "Rayffayzen Bank Aval" və Rumıniyanın KOM-la işləyən aparıcı banklarından biri - "Bank Transilvaniya"ya təqdim olunmuş maliyyələşdirmə paketləri var.
2009-cu ildə AYİB təxminən üç milyard avro maliyyə sektoruna, 1,5 milyard avro korporativ sektor və 2,5 milyard avro infrastruktur və energetikaya sərmayə qoyacaq.
Şərqi Avropa regionunun problemlərini həll etməyə can atan AYİB, digər beynəlxalq maliyyə institut və təşkilatları ilə sıx və uğurlu əməkdaşlığa girib.
"Regionun problemi Avropanın qalan hissəsinin problemləri ilə sıx şəkildə əlaqəlidir və onların həlli beynəlxalq maliyyə institutları və dövlət orqanları tərəfindən koordinasiya edilmiş tədbirlərdədir", - AYİB prezidenti Tomas Mirov deyib.
2007-ci ildə AYİB-in Şərqi Avropa ölkələrinə sərmayəsi 5,6 milyard avro təşkil edibsə, 2008-ci ildə onlar 5,1 milyarda qədər azalıb. Bunlar əsasən maliyyə böhranının ötən ilin son rübündə layihələrin imzalanması müddətlərinə təsir etməsi səbəbindən baş verib.
2008-ci ildə Bank ilk növbədə Qərbi Balkan, Azərbaycan, Ermənistan, Gürcüstan, Qırğızıstan, Moldova, Monqolustan, Tacikistan və Özbəkistanın iqtisadiyyatına sərmayələrə birinci dərəcədə diqqət yetirib. AYİB hələ də xüsusi diqqəti dayanıqlı energetika layihələrinə olan qoyuluşlara ayırır.
Bu ölkələrə sərmayələr ilk mərhələdə 14 faiz artaraq 586 milyon avro təşkil edib. Bununla yanaşı, Qərbi Balkanda bu rəqəmlər 16 faiz artaraq 534 milyon avro təşkil edib. Dayanıqlı energetika layihələrinə sərmayələr təxminən bir milyard dollara çatıb ki, bu da ümumi həcmin 20 faizi deməkdir.
1991-ci ildə yaranmasından sonra AYİB, 41,7 milyard avro həcmində öz sərmayəsini həyata keçirib. Üçüncü tərəflərlə birlikdə və yenidənmaliyyələşdirmə qaydasında bank, son 17 ildə 134,8 milyard avro sərmayə yatırıb.
Maliyyə böhranının nəticələrinə baxmayaraq, Avropa Bankı öz kapital bazasını saxlaya bilib; bununla yanaşı AYİB-in səhmdarlarının şəxsi vəsaitləri və 2008-ci ilin sonuna ödənilmək tələbi olan kapital 26,3 milyard avro təşkil edirdi ki, səhmdar kapitala kredit və qoyuluşlar kimi aktivlər 15,1 milyard avro həcmində olub.
AYİB həm də likvidliyin yüksək səviyyəsini və yüksək AAA kredit reytinqinə malik istiqrazçı kimi beynəlxalq kapital bazarına həqiqi çıxışını saxlayır.
2008-ci ildə Avropa Bankı Azərbaycan iqtisadiyyatına 114 milyon dollar sərmayə qoyub. Bu məbləğ 19 layihəyə yönəldilib.
Məqalə müəllifi ilə əlaqə ünvanı: [email protected]