Azərbaycan, Bakı, 11 mart / Trend , müxbir Ü.İsmaylova /
Layihənin benefesiarı olan Azərbaycan Daşınmaz Əmlakın Dövlət Reyestri Xidmətinin məlumatında deyilir ki, Azərbaycan və Dünya bankının (DB) birgə layihəsi olan "Daşınmaz əmlakın qeydiyyatı" Vaşinqtonda DB-nin baş ofisində müzakirə edilib.
Reyestr Xidmətinin rəhbəri Arif Qaraşovun başçılıq etdiyi nümayəndə heyəti DB-nin dəvəti ilə Vaşinqtona səfər edib.
Səfər çərçivəsində DB-nin "Daşınmaz əmlakın qeydiyyatı" layihəsi üzrə fikir mübadiləsi aparılıb və dövlət xidməti nümayəndələri ABŞ-ın bu sahədə olan təcrübəsi ilə tanış olublar.
Azərbaycan nümayəndə heyəti ABŞ-ın Daşınmaz Əmlakın Qeydiyyatı Assosiasiyasının (Property Records Industry Association) keçirdiyi "Daşınmaz əmlakla bağlı dələduzluğun qarşısının alınması barədə tədbirlər" mövzusunda konfransda iştirak ediblər.
Azərbaycan hökuməti və DB vahid daşınmaz əmlakın kadastr sisteminin birgə tətbiqi barədə 2007-ci ilin iyun ayında müqavilə imzalayıblar. Layihə bir sıra komponentlərdən ibarətdir - dövlət mülkiyyətinin idarə olunması və reyestri; daşınmaz əmlakın qeydiyyatı; təməl kartoqrafiya və torpaq kadastrı; treninqlər; siyasətin formalaşması və layihənin idarə olunması.
Layihənin dəyəri 38,57 mln. dollar təşkil edir ki, onun 30 mln. dolları kredit halında DB-nin payına düşür. Kredit resursları 5 illik güzəştlə 20 il müddətinə nəzərdə tutulub.
Məqalə müəllifi ilə əlaqə ünvanı: [email protected]