Azərbaycan, Bakı, 28 aprel / Trend , müxbir İ.Xəlilova /
Azərbaycan Vergilər Nazirliyi ilə Estoniyanın Vergilər və Gömrük Şurası arasında əməkdaşlıq barədə memorandum imzalanıb. Sənədi Bakıda Azərbaycanın vergilər naziri Fazil Məmmədov və Estoniyanın Vergilər və Gömrük Şurasının baş direktoru Enriko Aav imzalayıb.
"Tərəflər qeyd ediblər ki, memorandum qarşılıqlı əlaqələrə yeni təkan verəcək", - nazirlikdən bildirilib.
Estoniya nümayəndə heyətinin səfərdə məqsədi Azərbaycanın vergilər sistemi ilə tanış olmaqdır, bu səbəbdən vergilər naziri Fazil Məmmədov qonaqlara ölkədə bu sahədə aparılan islahatlar barədə ətraflı məlumat verib.
"Azərbaycanda aparılan islahatlar hətta beynəlxalq maliyyə təşkilatlarını da cəlb edib. Bunun nəticəsi olaraq ötən il DB və BMK Azərbaycanı islahatçı-ölkə kimi dəyərləndirib", - Məmmədov deyib.
Estoniya nümayəndə heyəti vergi idarəçiliyinin təkmilləşdirilməsi və informasiya texnologiyalarının tətbiqi istiqamətində ölkədə aparılan işlərlə tanış olublar.
Estoniyanın Vergilər və Gömrük Şurasının baş direktoru Azərbaycanın ƏDV üzrə depozit hesablama sisteminin tətbiqi sahəsində topladığı təcrübə ilə yaxından maraqlanıb. Səfər çərçivəsində qonaqlar sahibkarlıq subyektlərinin qeydiyyatı üçün ötən ildən tətbiq edilən "vahid pəncərə" sistemilə də tanış olacaqlar.
Estoniya tərəfi Vergilər və Gömrük Şurası çərçivəsində struktur dəyişikliklərin, x-road və e-audit layihələrinin təqdimatını keçirməyi nəzərdə tutur.
Məqalə müəllifi ilə əlaqə ünvanı: [email protected]
