Bakı. Trend:
Avropa ölkələri Hörmüz boğazından keçən gəmilər üçün rüsumun tətbiqi imkanını onun könüllü xarakter daşıyacağı təqdirdə mümkün hesab edirlər.
Bu barədə Böyük Britaniyanın "The Guardian" qəzeti məlumat yayıb.
Qəzetin məlumatına görə, Avropa paytaxtlarında hesab edirlər ki, belə ödəniş könüllü olmalı və BMT-nin Beynəlxalq Dəniz Təşkilatı (IMO) tərəfindən tənzimlənməlidir. Nümunə kimi Avropada Malakka boğazındakı vəziyyətin nəzərdən keçirilməsi təklif olunur: bu su yolu ilə tranzit ödəniş nəzərdə tutmasa da, dövlətlər və özəl korporasiyalar xüsusi fondlara könüllü ianələr edirlər. Həmin vəsaitlər sahilyanı dövlətlərə boğazın patrul xidmətinə və ekoloji təhlükəsizliyin təmin edilməsinə çəkilən xərclərin kompensasiyasına kömək edir.
"The Guardian" qəzetinin məlumatına görə, oxşar təklif Oman tərəfindən Britaniya vəkilləri ilə əməkdaşlıq çərçivəsində hazırlanıb. Qəzet qeyd edib ki, Oman hakimiyyəti planın ətraflı müzakirələri üçün hüquq mütəxəssislərini Tehrana göndərməyə hazırdır.
