Azərbaycan pensiya sığorta sistemində aktuar araşdırmaların aparılmasında alman təcrübəsini öyrənir
Azərbaycan, Bakı, 28 aprel / Trend , müxbir Ü.İsmayılova /
Azərbaycan Dövlət Sosial Müdafiə Fondu (ADSMF) pensiya sığorta sistemində aktuar araşdırmaların aparılması məsələsində Avropada ən qabaqcıl olan alman təcrübəsini öyrənmək niyyətindədir. Bu barədə ADSMF-in çərşənbə axşamı yayılan məlumatında bildirilir.
"Hazırda aktuar araşdırmalar Azərbaycan iqtisadiyyatı üçün yenilikdir, lakin Sosial Müdafiə Fondu bu sistemi tətbiq etmək niyyətindədir", - deyə məlumatda bildirilir.
Fond bu məqsədlə Almaniyanın Pensiya Sığorta İdarəsi ilə fəal əməkdaşlıq edəcək. Belə bir qərar Fondun nümayəndə heyətinin Almaniyaya beşgünlük səfəri zamanı qəbul olunub.
Məlumatda bildirilir ki, ikitərəfli görüşlərin yekunları üzrə növbəti belə bir görüşün Bakıda keçirilməsi barədə qərar qəbul olunub.
ADSMF sosial sığorta sahəsində aparılan islahatların növbəti mərhələsində 2015-ci ilədək aktuar araşdırmalar əsasında pensiya sığorta sisteminin inkişaf perspektivlərinin proqnozlaşdırılması sisteminə keçmək niyyətindədir.
Məqalə müəllifi ilə əlaqə ünvanı: [email protected]
