Azərbaycan, Bakı, 20 may / Trend , müxbir N.İsmayılova /
"Azərbaycan AYİB-i "2009-2013-cü illərdə regionların sosial-iqtisadi inkişafı üzrə Dövlət Proqramı"nın realizəsi çərçivəsində əməkdaşlığa cəlb etmək niyyətindədir", - ölkənin İqtisadi İnkişaf Nazirliyinin məlumatında deyilir.
Azərbaycanın iqtisadi inkişaf naziri Şahin Mustafayev AYİB-in mayın 15-16-da Londonda keçirilən illik iclasındakı çıxışında deyib ki, "2009-2013-cü illərdə regionların sosial-iqtisadi inkişafı üzrə Dövlət Proqramı" çərçivəsində ölkədə həyata keçirilən layihələrə, o cümlədən kənd təsərrüfatı, meliorasiya, su təchizatı layihələrinə Avropa Bankının sərmayələri məqsədəuyğun olardı.
O, həmçinin, AYİB-lə Sahibkarlığa Yardım Fondu və Azərbaycan İnvestisiya Şirkəti arasında sıx münasibətlərin yaradılmasına ümidini bildirib.
Bununla yanaşı, öz çıxışında o, ölkə iqtisadiyyatında aparılan islahatları, o cümlədən dünya maliyyə böhranı şəraitində Azərbaycan Hökumətinin valyuta ehtiyatlarından səmərəli istifadəsi, sahibkarlığa dövlət dəstəyinin, maliyyə intizamının gücləndirilməsi, milli valyuta kursunun sabit saxlanılması və böhranın ölkəyə təsirini neytrallaşdırmış sərmayə mühitinin yaxşılaşdırılması barədə də danışıb.
Mustafayev həmçinin, AYİB-in prezidenti Tomas Mirov və Avropa Sərmayə Bankının nümayəndələri ilə görüşüb. Görüşlərdə Azərbaycan iqtisadiyyatının birinci rüb ərzində inkişafı göstəriciləri və dünya maliyyə böhranı şəraitində ölkədə həyata keçirilən tədbirlər, gələcək əməkdaşlığın perspektivləri müzakirə edilib. Bununla yanaşı, tərəflər dövlət proqramı ilə bağlı fikir mübadiləsi də aparıblar.
2008-ci ildə AYİB ölkədə ümumilikdə 84 milyon avro həcmində 19 layihəni maliyyələşdirib. Ümumilikdə, AYİB Azərbaycanda ümumi həcmi 1 milyard avro olan 109 layihəni maliyyələşdirib.
Məqalə müəllifi ilə əlaqə ünvanı: [email protected]