Azərbaycan, Bakı, 22 may / Trend , müxbir Ü.İsmayılova /
Azərbaycan banklarının kredit siyasətinin aktivləşməsi iyunun 1-dən bərpası gözlənilən ipoteka kreditləşməsinin zamanı baş verəcək. Bu barədə Texnika Bank-ın müşahidə şurasının sədri Etibar Əliyev deyib.
"Hazırda kredit bazarının aktivləşməsi üçün Azərbaycan bankları müxtəlif təkliflər irəli sürür. Lakin inkişafın ən vacib elementi ipoteka kreditləşməsidir", - Əliyev qeyd edib.
Onun sözlərinə əsasən, iyunun 1-dən Azərbaycan İpoteka Fondu (AİF) xətti ilə Mərkəzi Bank yanında ipoteka kreditləşməsi bərpa ediləcək. Qeyd edək ki, ipoteka kreditləşməsi 2007-ci ilin yayından dayandırılıb. Kreditlərin verilməsi siyasətində əhəmiyyətli dərəcədə dəyişikliklər olmayacaq.
AİF ipotekanın bərpasını şərh etmir.
2006-cı ilin martından 2007-ci ilin iyununa qədər AİF yaşayış evlərinin alınmasının maliyyələşdirilməsi istiqamətində aktiv fəaliyyət göstərib. Banklar tərəfindən 67,9 milyon manat həcmində ipoteka krediti ayrılıb.
Məqalə müəllifi ilə əlaqə ünvanı: [email protected]