Azərbaycan, Bakı, 22 may / Trend , müxbir N.İsmayılova/
ADA şirkətlər qrupu Qara Dəniz Ticarət və İnkişaf Bankından (QDİTB) 6 milyon dollar həcmində ilk tranşı iyunda alacaq. Bu barədə ADA Group-un direktorlar şurasının sədri Sergey İvaşkeviç deyib.
"QDTİB tərəfindən ilk tranş iyunda alınacaq. Digər beynəlxlq maliyyə təşkilatları tərəfindən əlavə vəsaitin cəlb edilməsi məsələsi isə vəsaitin istifadə olunması və kredit xəttinin bağlanmasından asılı olacaq", - İvaşkeviç qeyd edib.
Onun sözlərinə əsasən, əlavə xarici borcların cəlb edilməsi məsələsi ikinci rübdən sonra dəqiqləşdiriləcək.
QDTİB 2008-ci ilin sonunda ADA Group-a 9 milyon dollar həcmində kreditin verilməsinə razılıq verib.
"Almalı" Azərbaycanın qeyri-neft sektorunda Beynəlxalq Maliyyə Korporasiyasının (IFC) iri layihələrindən biridir. ADA şirkətlər qrupu 2005-ci ildə yaradılıb və 2007-ci ildə ümumi dəyəri 50 milyon dollar olan "Almalı" supermarket şəbəkələri layihəsi start götürüb.
IFC dən əvvəl ADA şirkətinin 80%-i Avstriyanın "A & DA Holding GmBH"a məxsus olub. Səhmlərin yerdə qalan 20%-lik hissəsi isə şirkətin Azərbaycan menecmenti arasında bölüşdürülüb.
Hazırda "Almalı"nın 40 mağazası Azərbaycanın üç şəhərində fəaliyyət göstərir: Bakıda 35, Sumqayıtda 3, Gəncədə 2 və bir paylayıcı mərkəz Xırdalanda.
Məqalə müəllifi ilə əlaqə ünvanı: [email protected]
