Türkmənistan, Aşqabad, 09 iyul / Trend , H.Həsənov /
Avropan Yenidənqurma və İnkişaf Bankı (AYIB) Aşqabadda özəl sektorun inkişafı üçün nəzərdə tutulmuş TAM/BAS proqramının təqdimatını keçirib, Türkmənistanın dövlət xəbər xidməti məlumat verib.
Söhbət müəssisələrdə idarəetmənin təkmilləşdirilməsi, sahibkarlığın inkişafına yardım edən işgüzar mühitin yaradılması, yüksək artım potensialı olan sahələrin stimullaşdırılması, onların arasında rəqabətin artırılması, investisiyaların cəlb olunması, bazar iqtisadiyyatının inkişafından gedir.
Tədbirdə aparıcı nazirliklərin və müəssisələrin mütəxəssisləri, dövlət və səhmdar-ticarət banklarının mütəxəssisləri, həmçinin müəssisə, o cümlədən özəl sektor rəhbərləri iştirak ediblər.
Türkmənistanın dövlət xəbərlərinin verdiyi məlumatda deyilir ki, AYİB-in TAM/BAS proqramı üzrə direktoru Şarlot Selford hazırki layihənin ölkə iqtisadiyyatının özəl sektorunun inkişafına yönəldiyini bildirib.
AYİB peşəkar kadrların ixtisaslarının artırılması sahəsində Türkmənistan tərəfinə yardım etməyə hazır olduğunu bildirib. Məlumdur ki, dünyanın, həmçinin Avropanın iri banklarının təcrübələrinin öyrənilməsi, maliyyə sahəsinin idarə olunmasında müasir üsulların tətbiqi ölkədə həyata keçirilən irimiqyaslı iqtisadi islahatlar zəminində türkmən mütəxəssisləri üçün xüsusi əhəmiyyət kəsb edir.
Aparıcı beynəlxalq maliyyə təşkilatlarından biri olan Avropa Yenidənqurma və İnkişaf Bankı 1991-ci ildə təsis edilib. Bu, həm özəl, həm də dövlət sektorunda uzunmüddətli kredit verən, regionun ən böyük özəl investor və kreditorudur.
Avropa Yenidənqurma və İnkişaf Bankı kiçik və orta müəssisələrin inkişafına yardımı müəssisələrin nizamlanması və işgüzar məsləhət proqramları (TAM/BAS) vasitəsilə həyata keçirir. Onun əsas məqsədi kommersiya və texniki "nou-hau"nun inkişafına konkret sahələrin xüsusiyyətlərini nəzərə alaraq, potensial gəlirli müəssisələrə konsultasiya xidmətinin göstərilməsi, həmçinin sahibkarlıq fəaliyyəti üçün inzibati-hüquqi şərtlərin yaxşılaşdırılmasıdır
TAM/BAS proqramının yaranmasından bəri Avropa Komissiyası daxil olmaqla, 27 donor tərəfindən verilmiş 44 milyon avrodan çox qrant hesabına 900-dən çox layihə həyata keçirilib.
Məqalə müəllifi ilə əlaqə:[email protected]
