Azərbaycan, Bakı, 09 iyul / Trend , müxbir N.İsmayılova /
"Hollandiyanın İnkişaf Maliyyə Şirkəti (FMO) daha üç Azərbaycan bankı ilə maliyyələşdirmə məsələlərini müzakirə edir", - Bakıda səfərdə olan FMO-nun maliyyə institutları üzrə direktoru Ruurd Brauer deyib.
"Biz daha üç Azərbaycan bankı ilə sərmayə məsələlərini müzakirə edirik, ancaq hazırda bizim dəqiq kredit dəstəyimiz yoxdur. Hələ ki hər şey yalnız müzakirə səviyyəsindədir", - Brauer bildirib.
Onun sözlərinə görə, şirkət 2010-cu ildə də Azərbaycan iqtisadiyyatını sərmayələşdirməkdə davam edəcək.
"Hazırda biz beş Azərbaycan bankı ilə çalışırıq və məhz bu banklar sərmayələşdirməni davam etdirmək məsələlərini müzakirə etdiyimiz banklardır, - Bauer qeyd edib. - Çünki bizim dünya maliyyə böhranı şəraitində ilk məqsədimiz artıq mövcud planın dəstəklənməsidir və yalnız bundan sonra biz yeni biznes axtarışına çıxacağıq".
Bauerin sözlərinə görə, FMO həmçinin real sektora da nəzər yetirir, ancaq əsasən diqqətini artıq bilavasitə maliyyələşdirilən kiçik və orta sahibkarlıq layihələri üzərində cəmləşdirir.
"Məncə, Azərbaycan hazırda regionun ən səmərəli fəaliyyət göstərən iqtisadiyyatlarından birinə malikdir. Bu, bir qədər neft-qaz sənayesinin inkişafı hesabınadırsa, digər tərəfdən Azərbaycan Mərkəzi Bankının rolu hesabına baş verir ki, bunlar çox yaxşı təşkil olunublar və sabitlik gətirirlər", - Bauer bildirib.
FMO Hollandiyanın Beynəlxalq İnkişaf Bankıdır. FMO şirkətlərin risk kapitalı və inkişaf etməkdə olan ölkələrdə maliyyə idarələrini sərmayələşdirir. FMO-nun sərmayə portfeli 3,4 milyard avro təşkil edir ki, bu da onu dünyanın ən böyük ikitərəfli banklarından birinə çevirir. FMO-nun əsas missiyası öz ölkələrində həyat qabiliyyətli artımın mühərriki rolunu oynaya biləcək, çiçəklənən müəssisələrin yaradılmasıdır.
Məqalə müəllifi ilə əlaqə ünvanı: [email protected]
