Azərbaycan, Bakı, 10 iyul / Trend , müxbir N. İsmayılova /
Azərbaycanın Qiymətli Kağızlar üzrə Dövlət Komitəsi (QKDK) Milli Depozit Mərkəzinin (MDM) yeni yaradılmış strukturunu təsdiq edib. Bu barədə Mərkəzdən məlumat verilib.
Səhmdarların və Müşahidə Şurasının 12 iyunda keçirilən birgə iclasının nəticələrinə əsasən, Mərkəzin yeni strukturunun yaradılması barədə qərar qəbul edilib. Qərara əsasən, qiymətli kağızlar bazarında infrastruktur tələbatına və korporativ idarəetmə prinsiplərinə cavab verən yeni struktur bölməsi və ikipilləli idarəetmə sistemi yaradılıb.
Depozit Mərkəzi "vahid pəncərə" sisteminə daxil olub. Mərkəzin müştərilərinə göstərilən xidmətin yaxşılaşdırılması və MDM-də prosedurun sürətləndirilməsi məqsədilə müştəri xidməti departamenti yaradılıb. Bu departament ofislər vasitəsilə müştərilərə xidmət gösətərəcək və ilkin sənədlərin və müştərilərə verilən sənədlərin öyrənilməsi üzrə fəaliyyət həyata keçirəcək. O cümlədən, göstərilən müştəri xidmətinin sistemləşdirilməsi və sadələşdirilməsi məqsədilə elektron sistemin tətbiq edilməsi işi başa çatmaq mərhələsindədir.
Bundan əlavə, MDM xidmətlərin yeni növünün tətbiqinə başlayıb. Mərkəz təmin olunmuş istiqrazlar üzrə xidmət göstərilməsinə başlayıb. Onlardan birincisi 55 milyon manat həcmində emisiya olunmuş, Azərbaycan İpoteka Fondunun istiqrazlarıdır.
İyulun 10-na olan rəsmi məzənnə 0,8043 AZN/USD təşkil edir.
Məqalə müəllifi ilə əlaqə ünvanı: [email protected]