Аzərbaycan, Bakı, 27 iyul / Trend , müxbir P.Əliyev /
Azersun Holding çay plantasiyalarının genişləndirilməsi məqsədi ilə bu ildən etibarən yaşıl çay yarpağı xammalının bir kiloqramını bir manata almağa başlayıb. Ötən ildə bu göstərici 60-70 qəpik təşkil edib. Bu barədə jurnalistlərin Lənkəran və Astara (Azərbaycanın cənubunda) çay plantasiyalarına səfəri zamanı fermerlər bildirib.
Əvvəllər bu sahədə çalışan fermerlər üçün ən vacib məsələlərdən biri çay yarpağı xammalı bazarının olmaması idi. Emaletmə müəssisələri az idi və onların şəxsi istehsalat sahələri var idi.
Azersun Holding çay yarpağını birbaşa fermerlərdən alır və onu quru çay istehsalı üzrə zavodlarında emal edir. Dörd kiloqram çay yarpağı xammalından bir kiloqram quru çay əldə olunur.
Azersun Holdingin İctimaiyyətlə əlaqələr və sosial layihələr şöbəsinin müdiri Afiq Səfərovun bildirdiyi kimi, şirkət ölkədə çay inkişafına maddi və mənəvi dəstək göstərməyə hazırdır.
Fermerlərdən biri jurnalistlərə bildirib ki, hazırda çay yarpağının yığılması ildə iki-üç dəfə həyata keçirilir, lakin müasir aqrotexnik servisin mövcud olması sayəsində məhsuldarlığı ildə beş-altı dəfə artırmaq mümkün olacaq.
Məqalə müəllifi ilə əlaqə ünvanı: [email protected]