Azərbaycan, Bakı, 19 avqust / Trend , müxbir İ.Хəlilova /
"Azərbaycanın Avropa Yenidənqurma və İnkişaf Bankının (AYİB) Direktorlar Şurasındakı nümayəndəsi Verner Qruber sentyabrın əvvəlində ilk dəfə Azərbaycana direktor qismində səfər edəcək", - çərşənbə günü AYİB-in Bakı nümayəndəliyindən deyilib. Verner Azərbaycanla yanaşı, İsveçrə, Türkiyə, Lixtenşteyn, Özbəkistan, Qırğızıstan, Türkmənistan, Serbiya və Çernoqoriyanın maraqlarını təmsil edir.
"AYİB direktorunun Azərbaycana səfəri diplomatik xarakter daşıyır və onun tarixi müəyyən edilməyib. Bu səfərlər ilyarım və ya iki ildən bir həyata keçirilir, - nümayəndəlikdən bildirilib. - Bununla əlaqədar olaraq, səfər çərçivəsində müqavilənin imzalanması, ölkəyə kömək strategiyası çərçivəsində müzakirələrin aparılması nəzərdə tutulmayıb".
Azərbaycan hökuməti ilə uzunmüddətli əməkdaşlıq siyasətinin təsdiqi məqsədilə AYİB-in Cənubi və Şərqi Avropa, Qafqaz, Mərkəzi Asiya ölkələri üzrə biznes-qrupunun direktoru Olivye Dekamp apreldə Bakıda olub. O, Azərbaycandakı durumu regionun digər ölkələri ilə müqayisədə daha yaxşı qiymətləndirib. Bu, ölkə tərəfindən bir neçə il bundan əvvəl qəbul edilən qərarların nəticəsində mümkün olub. Bu qərarlara Dövlət Neft Fondunun yaradılması, neft-qaz sektorunun optimallaşdırılması, rəqabətqabiliyyətli bank bazarının yaradılması da daxildir.
Onun proqnozlarına görə, 2009-cu ilin sonuna qədər AYİB-in Azərbaycan üçün qəbul edilmiş sərmayələrinin ümumi həcmi bir milyard dolları ötəcək. 2008-ci ildə bank Azərbaycandakı 19 layihəyə 120 milyon dollar sərmayə yatırıb. 2009-cu ildə bu rəqəm 14-15 müxtəlif layihə üçün 220 milyon dollara bərabər olacaq.
AYİB Azərbaycanda ümumilikdə 90 layihə həyata keçirərək və bunun üçün 1,2 milyard dollar sərmayə yatırıb.
Məqalə müəllifi ilə əlaqə ünvanı: [email protected]
