Azərbaycan, Bakı, 26 avqust / Trend , müxbir Ü.İsmayılova /
Sökülmüş abidələrin saxlanılması üçün Azərbaycan Prezidentinin fərmanı ilə yaradılacaq xiyaban Bakının Nobel prospektində yerləşən sənaye şəhərciyi ərazisində yerləşəcək, çərşənbə axşamı Azərbaycan Respublikası Dövlət Şəhərsalma və Arxitektura Komitəsinin şəhərsalma şöbəsinin başçısı Yusif İbrahimli bildirib.
"Xiyabana hazırda öz aktuallığını itirən ölkədəki bütün abidələr köçürüləcək", - İbrahimli deyib.
Onun sözlərinə əsasən, sökülmüş abidələr tarixi əhəmiyyətini itirsə də, bununla belə heykəltaraşlıq və arxitektura nümunələri olaraq qalır.
"Xiyaban vətəndaşlara onların tarixi barədə xatırladacaq, həmçinin ölkənin tarixi və mədəniyyəti ilə tanış olmaq istəyən turistlərin Bakıya axınına yardım edə bilər", - İbrahimli bildirib.
İbrahimli hesab edir ki, Bakıda bu kimi xiyabanın yaradılması vacibdir, belə ki, hazırda sökülmüş abidələrin harada yerləşməsi bir çoxlarına məlum deyil, bundan əlavə, həmin abidələr bahalı materiallardan hazırlanıb.
İbrahimli xiyabana köçürüləcək abidələrin dəqiq sayını açıqlamayıb.
Abidə xiyabanının yaradılması Prezident İlham Əliyev tərəfindən avqustun 19-da təsdiqlənmiş Azərbaycan Respublikası ərazisində yerləşən əzəmətli heykəltaraşlıq abidələrinin, xatirə və arxitektura komplekslərinin ümumi görünüşünün saxlanılması və mühafizəsi, onların ətrafının abadlaşdırılması üzrə tədbirlər planında nəzərdə tutulub.
Bakı İcra Hakimiyyəti və yerli icra hakimiyyəti orqanları Azərbaycan Respublikası Dövlət Şəhərsalma və Arxitektura Komitəsi, Milli Elmlər Akademiyası, Azərbaycanın Rəssamlar İttifaqı və Memarlar İttifaqının rəyini nəzərə alaraq sökülməli olan, incəsənət əhəmiyyətli heykəltaraşlıq abidələrinin saxlanılması üçün xiyabanın yaradılacağı ərazini müəyyən etməli və təkliflər hazırlamalıdır.
Tədbirlər planına əsasən, Azərbaycan Mədəniyyət və Turizm Nazirliyi Bakı İcra Hakimiyyəti və yerli icra hakimiyyəti orqanları ilə birgə ilin sonuna kimi Azərbaycan Respublikası ərazisində yerləşən əzəmətli heykəltaraşlıq abidələrinin, xatirə və arxitektura komplekslərinin dövlət reyestrini tərtib etməlidir.
Azərbaycan Respublikası Dövlət Şəhərsalma və Arxitektura Komitəsi, Bakı İcra Hakimiyyəti və yerli icra hakimiyyəti orqanlarına öz növbəsində 2009-2010-cu illərdə təmir və bərpa işlərinin həyata keçirilməsi tapşırılıb.
Azərbaycanın Mədəniyyət və Turizm Nazirliyi, Azərbaycan Respublikası Dövlət Şəhərsalma və Arxitektura Komitəsi, Bakının İcra Hakimiyyəti və yerli icra hakimiyyəti orqanlarına Azərbaycan Respublikası ərazisində yerləşən , milli mədəniyyət ideyalarına müvafiq olaraq qurulacaq əzəmətli heykəltaraşlıq abidələrinin, xatirə və arxitektura komplekslərinin eskiz və layihə-smeta sənədləşməsinin hazırlanması tapşırılıb.
Məqalə müəllifi ilə əlaqə ünvanı: [email protected]