Azərbaycan, Bakı, 03 sentyabr / Trend , müxbir İ.Xəlilova /
Mərkəzi Bank yanında fəaliyyət göstərən Azərbaycan İpoteka Fondu (AİF) "Texnika Bank" ASC üçün ipoteka maliyyələşdirilməsi limitini dörd milyon manatadək daha bir milyon manat artırıb. Bu barədə cümə axşamı bankın İdarə Heyətinin sədri Samir Hüseynov deyib.
"Azərbaycanda 2009-cu ilin iyunundan ipoteka kreditləşməsinin bərpasından etibarən Texnika Bank üçün limit çərçivəsində nəzərdə tutulan vəsaitin hamısını paylamışıq", - Hüseynov deyib.
Bu günə xüsusi ipoteka proqramını da nəzərə almaqla bankın ipoteka protfeli 40 milyon manat səviyyəsində formalaşdırılıb. Bu vəsaitdən 8 milyon dolları Qara Dəniz Ticarət və İnkişaf Bankının krediti hesabına, 12 milyon manatı bankın şəxsi vəsaiti, qalanı isə AİF-in xətti ilə təmin edilib.
Hüseynovun sözlərinə görə, ölkədə ipoteka kreditləşməsinin başlamasından etibarən AİF-in xətti ilə 450 kredit verilib.
Ümumi ipoteka portfelinin 2009-cu ilin sonunadək 55 milyon manat, il ərzində isə 75 milyon manata çatdırılması planlaşdırılır. Bu, Texnika Banka ipoteka portfelini mühafizə etməyə imkan verəcək.
Hüseynovun sözlərinə görə, Texnika Bank hazırda əlavə maliyyə resurslarının cəlb edilməsi üzrə danışıqlar aparır. Çünki dünya kapital bazarında vəziyyət artıq yaxşılaşır. Bank ilk krediti 2007-ci ildə Qara Dəniz Ticarət və İnkişaf Bankından altı il müddətinə libor+3 faiz dərəcəsi ilə cəlb edib.
Sentyabrın 03-nə olan rəsmi məzənnə 0,804 AZN/USD təşkil edir.
Məqalə müəllifi ilə əlaqə ünvanı: [email protected]
