Azərbaycan, Bakı, 10 sentyabr / Trend , müxbir Ü.İsmayılova /
2008-ci ilin fevralında ləğv edilmiş "Azər-Asiya" Azərbaycan-İran birgə sığorta şirkətinin azərbaycanlı təsisçiləri təsviyə komissiyasının yaradılması üzrə qərar qəbul edilməsi məqsədi ilə məhkəməyə müraciət etmək niyyətindədirlər. Bu barədə cümə axşamı şirkətin İdarə Heyətinin sədri Qəmbər Suvanverdiyev deyib.
"İran tərəfinin "Azər-Asiya"nın ləğvindən imtinası ilə əlaqədar olaraq, avqustun 31-də şirkətin təsisçilərinin növbəti yığıncağında məhkəmə instansiyalarına müraciət etmək barədə qərar qəbul edilib", - Suvanverdiyev deyib.
Onun sözlərinə görə, şirkətin ləğvindən təxminən il yarım keçib, lakin İran tərəfinin şirkətin fəaliyyətinin dayandırılması faktı ilə razılaşmaması ilə əlaqədar olaraq, təsviyə komissiyası hələ də yaradılmayıb. Hazırda "Azər-Asiya"nın azərbaycanlı təsisçiləri artıq yaxın zamanlarda məhkəməyə müraciət etmək üçün müvafiq sənədləri hazırlayırlar.
Azərbaycanın Maliyyə Nazirliyi hələ keçən il "Azər-Asiya" birgə sığorta şirkətinə 21 noyabr 2002-ci ildə sığorta fəaliyyətinə görə verilmiş lisenziyanın fəaliyyət müddətinin uzadılmasından imtina edib. Fəaliyyət müddətinin prolonqasiyasından imtina üçün səbəblər 2006-cı il oktyabrın 1-dən 2007-ci ilin oktyabrına qədər olan dövr ərzində şirkətin fəaliyyətinin sığorta qanunvericiliyi və lisenziya tələblərinə uyğunluğu analizlərinin nəticələri olub. Yoxlamalar zamanı pozuntu halları aşkarlanıb.
Bu qərarın elan edilməsindən sonra şirkət portfelini müqavilə şərtlərini dəyişdirmədən digər şirkətə - BE&G-yə verib. Bu vaxt şirkətin təxminən 17 min fiziki və 60 korporativ müştərisi olub.
"Azər-Asiya" birgə sığorta şirkəti Azərbaycanın sığorta bazarında 1997-ci ildən fəaliyyət göstərib. Şirkətin təsisçiləri İranın "Asiya Sığorta" (49 faiz) və Azərbaycanın "AzərSığorta" dövlət sığorta kommersiya şirkətidir (51 faiz).
Məqalə müəllifi ilə əlaqə ünvanı: [email protected]
