...

Azərbaycanda sosial islahatların tətbiq edilməsi üzrə beynəlxalq məsləhətçi seçiminə dair müsabiqə elan edilib

Biznes və iqtisadiyyat xəbərləri Materials 25 Sentyabr 2009 17:52 (UTC +04:00)

Azərbaycan, Bakı, 25 sentyabr / Trend , müxbir Ü.İsmaylova /

Azərbaycanın Əmək və Əhalinin Sosial Müdafiəsi Nazirliyi sosial sahədə islahatların aparılması üzrə beynəlxalq təcrübənin tətbiqi istiqamətində təkliflərin hazırlanması ilə bağlı "Azərbaycanda sosial müdafiənin inkişafı" layihəsi üzrə beynəlxalq məsləhətçinin seçilməsi üçün müsabiqə elan edib. Bu barədə cümə günü nzirliyin Beynəlxalq əməkdaşlıq şöbəsinin rəhbəri Elnur Sultanov bildirib.

"Nazirliyə artıq bir neçə iri konsorsium tərəfindən bir sıra təkliflər daxil olub", - Sultanov deyib.

Onun sözlərinə görə, artıq ABŞ, Britaniya, İsveç, Avstriya, Hollandiya və digər ölkələrin konsorsiumları tərəfindən müraciətlər alınıb.

Sultanovun sözlərinə görə, beynəlxalq məsləhətçinin əsas vəzifəsinə əmək bazarının təkmilləşdirilməsi sahəsində beynəlxalq təcrübənin öyrənilməsi, məşğulluğun yüksəldilməsi, regional tədris mərkəzlərinin və gənclər üçün peşə mərkəzlərinin yaradılması, karyera artımı məsələləri, sosial islahatlar və b. daxildir.

"Məsləhətçi seçimini bu ilin sonunadək bitirmək planlaşdırılır", - Sultanov bildirib.

54,6 milyon dollar dəyərində olan "Azərbaycanda sosial müdafiənin inkişafı" layihəsi üçün kredit müqaviləsi Dünya Bankı və Azərbaycan hökuməti arasında 2008-ci ilin noyabr ayında imzalanıb. Dünya Bankı Beynəlxalq İnkişaf Assosiasiyasının şərtləri əsasında layihənin maliyyələşdirilməsi üçün 26,7 milyon dollar vəsait ayırıb (imtiyaz dövri 10 il olmaqla 35 il və illik 0,75 faiz).

Bu layihə dörd komponentdən ibarətdir: əmək qanunvericiliyi, əməyin mühafizəsi sistemi; məşğulluq xidməti fəaliyyətinin təkmilləşdirilməsi də daxil olmaqla əmək bazarı sisteminin tam şəkildə modernləşdirilməsi; sosial təminat sistemi siyasətinin formalaşdırılması; təqaüd sistemi və layihənin idarə edilməsinin modernləşdirilməsi.

Layihə çərçivəsində peşəkar təhsil sisteminin tam şəkildə institusional inkişaf və modernləşdirilməsi, avropa təcrübəsi əsasında peşəkar klassifikatorların hazırlanması və nazirlik nəzdində peşəkar tədris mərkəzlərinin yaradılması nəzərdə tutulur. Layihənin realizasiyası 2008-ci ildən 2013-cü ilədək beş il müddətinə nəzərdə tutulur.

Sosial sektorda Dünya Bankı artıq bir layihəni maliyyələşdirib. 2005-ci ildən etibarən "Təqaüd islahatları və sosial təminat" layihəsi həyata keçirilir. Bu layihəyə bank tərəfindən 10 milyon dollar vəsait ayrılıb.

Məqalə müəllifi ilə əlaqə ünvanı: [email protected]

Xəbər lenti

Xəbər lenti