Azərbaycan, Bakı,13 oktyabr / Trend , müxbir N.İsmayılova/
Azərbaycanda yeganə şəkər istehsal edən zavodun sahibi olan Azərsun Holding şirkətlər qrupu bir ton şəkərin qiymətini 11 faiz artırıb, holdinqin ictimai əlaqələr və sosial xidmətlər departamentinin başçısı Kazım Babayev çərşənbə axşamı deyib.
"Dünya birjalarında şəkərin qiymətləri cüzi də olsa artmaqda davam edir. Bu da ölkə daxilində şəkərin qiymətlərinə təsir edib", - Babayev deyib.
Onun sözlərinə görə, Azərsun Holding qiymətlərin artımını saxlamağa çalışır. Hazırda ölkədə şəkər çuğundurunun yığılması başa çatır, əgər dünya bazarlarında qiymətlərin artım tendensiyası davam edərsə, ilin sonunadək ölkənin daxili bazarında da qiymətlərin artımı gözləniləcək.
Azərbaycanda şəkər istehsalı üçün xammalın böyük hissəsi ölkəyə xaricdən gətirilir. İstehsalın müəyyən hissəsi ölkədə becərilən şəkər çuğundurunun emalı hesabına həyata keçirilir. 2006-cı ildən Azərsun fermerlərə müxtəlif cür kömək göstərməklə ölkədə şəkər çuğunduru yetişdirilməsinin inkişafında fəal iştirak edir.
Azərsunq Holding-dən deyilib ki, İmişli zavodunda istehsal olunan şəkər həm daxili bazarın təminatına yönəldilir, həm də Mərkəzi Asiya ölkələrinə ixrac edilir. Zavod üçün ən vacibi məhsullarının rəqabətədavamlı olmasıdır.
Hazırda İmişli zavodunun məhsulları Azərbaycanın şəkərə olan tələbatından təxminən iki dəfə artıqdır: zavodun illik şəkər istehsalı 400-450 min ton təşkil edir. Daxili bazarın şəkərə olan tələbatı isə 230-250 min tondur.
İmişli zavodunun məhsulları Türkmənistan, Əfqanıstan, Gürcüstan Ukrayna və İraqa ixrac edilir.
Azərsun Holding 1992-ci ildə yaradılıb. Holdingin fəaliyyət sahələri bunlardır: çayın, bitki yağlarının emalı və qablaşdırılması, ticarət və distribüterlik, inşaat, bank işləri, sığorta, karton-kağız istehsalı, ət və tərəvəz konservləri, yüklərin daşınması, saxlanması və s.
Məqalə müəllifi ilə əlaqə ünvanı: [email protected]