Azərbaycan, Bakı, 19 oktyabr / Trend , müxbir İ.Xəlilova/
2009-cu ilin yanvar-sentyabr aylarında Azərbaycanda sənaye istehsalının (məhsul istehsal edilib və sənaye xarakterli xidmət göstərilib) həcmi 15 624,9 milyon manat təşkil edib ki, bu da ötən ilin müvafiq dövründəki göstəricidən 5 faiz çoxdur. Bu barədə bazar ertəsi Dövlət Statistika Komitəsindən məlumat verilib.
Hesabat dövrü ərzində hasilat sənayesində artım tempi 7,8 faiz səviyyəsində olub, ümumi istehsalda isə 74,6 faizlik xüsusi çəki ilə 11 651,1milyon manat təşkil edib. Lakin emaledici sənayedə 7 faiz azalma müşahidə olunub və 3117,9 milyon manat (19.9 faiz) təşkil edib. Elektrik enerjisi, qaz və su sektoruna isə 8,8 faizlik azalma ilə 855.9 milyon manat düşür.
Neftçıxarmada istehsal artımı 8,5 faiz, qazçıxarmada isə 0,6 faiz təşkil edib. Neft emalında istehsal həcmi 9,1 faiz azalıb.
Hesabat dövrü ərzində nəqliyyat avadanlıqlarının istehsalında 9,7 faiz artım müşahidə olunub. Sellüloz-kağız istehsalı 2,3 dəfə, ərzaq məhsullarının istehsalında (spirtli və tütün məhsulları daxil olmaqla) və mətbəə işləri sahəsində isə artım əvvəlki səviyyədə qalıb.
Yanvar-sentyabr ayları ərzində qeyri-dövlət sektorunun payı ümumi sənaye istehsalının 79,6 faizini (12443,2 milyon manat) təşkil edib. Qeyri-dövlət sektorunda artım 8,9 faiz səviyyəsində olub, dövlət səanyesində isə 7,9 faiz səviyyəsində azalma olub.
Oktyabrın 19-na olan cari məzənnə 0,803 AZN/USD təşkil edir.
Məqalə müəllifi ilə əlaqə ünvanı: [email protected]
