Azərbaycan, Bakı, 19 oktyabr / Trend , müxbir N.İsmayılova/
"Azərbaycan İnvestisiya Şirkətinin (AİŞ) azad vəsaitləri 48 milyon manat təşkil edir, buna görə də hazırda şirkətin kapitallaşdırılmasına ehtiyac yoxdur", - bazar ertəsi AİŞ-in icraçı direktoru Əfqan İsayev deyib.
"2009-cu ilin sonunadək və 2010-cu ildə biz bu azad vəsaitlər hesabına sərmayələr yatıracağıq. Əgər əlavə vəsaitlərə tələbat olarsa, onda biz kapitallaşdırmanı artıracağıq. Amma hazırda buna ehtiyac duymuruq", - İsayev deyib.
Hazırda AİŞ beş layihəni nəzərdən keçirir. Dörd layihənin ümumi dəyəri 100 milyon manat qiymətləndirilir. İsayevin sözlərinə görə, beşinci layihə isə kifayət qədər böyük investisiya yatırımı tələb edir. O deyib ki, bu layihələrin maliyyələşdirilməsi ilə bağlı qərar altı ay ərzində qəbul olunacaq.
İsayevin sözlərinə görə, hazırda AİŞ beş layihəni: kənd təsərrüfatı sahəsində üç, sənaye sahəsində isə iki layihəni maliyyələşdirir.
Şirkətin nizamnamə kapitalı 90 milyon manat təşkil edir.
Azərbaycan İnvestisiya Şirkətinin minimum investisiya həcmi bir milyon manat ola bilər. Maksimum limit isə bir layihədə AİŞ kapitalının 20 faizi həcmində və ya ona uyğunlaşdırılmış həcmdə ola bilər. Bu günə bu limit 18 milyon manat təşkil edir, lakin AİŞ-in kapitalının artması ilə dəyişəcək.
AİŞ ölkə Prezidentinin qərarı ilə 2006-cı il martın 30-da yaradılıb.
Məqalə müəllifi ilə əlaqə ünvanı: [email protected]
