Azərbaycan, Bakı, 28 oktyabr / Trend , müxbir E.İsmayılov/
Azərbaycanın Bakı Beynəlxalq limanı ilə İranın Ənzəli Ticarət limanı arasında dəniz sərnişindaşımalarının bərpa edilməsi tarixi başqa vaxta keçirilib. Bu barədə Bakı limanındakı mənbədən çərşənbə günü məlumat verilib. İki ölkə arasında dəniz sərnişindaşımaları bir müddət əvvəl oktyabrın 28-nə planlaşdırılmışdı.
"Daha əvvəllər sərnişindaşımaların bu gündən başlanması planlaşdırılmışdı. Lakin İran tərəfində bir az gecikmə var. Ola bilsin ki, bu hal hava şəraiti ilə əlaqədardır. Hazırda bu məsələ dəqiqləşdirilir. Yaxın günlərdə daşınmalara başlanacaq", - mənbədən deyilib.
Mənbədən daha əvvəllər bildirilmişdi ki, bu sərnişin xətti uzun illər fəaliyyət göstərib, 1998-ci ildən isə fəaliyyəti dayanıb. Onun bərpa edilməsi məsələsi İran və Azərbaycanın dövlət strukturları arasında razılaşdırılıb. İki tərəf də artıq bu xəttin bərpa edilməsinə dair razılığa gəliblər. İran tərəfinin məlumatına görə, ilk reys oktyabrın sonunda olacaq. Bundan sonrakı reyslər isə müntəzəm olacaq.
Xəzər dənizi üzrə Ənzəli-Bakı, Bakı-Ənzəli sərnişin reysləri həftədə iki dəfə həyata keçiriləcək. Bunun üçün Azərbaycanda iki liman arasında işləyəcək gəmilərə rəhbərlik edən İran Gəmiçilik Şirkətinin daimi nümayəndəliyi yaradılacaq. 150 sərnişin tutumuna malik olan gəmilər komfortludur.
İran tərəfi, həmçinin gələcəkdə Bakıdan İranın digər Xəzər limanları - Əmirabad və Nouşəhrə daşınmaların həyata keçirilməsini planlaşdırır.
Məqalə müəllifi ilə əlaqə ünvanı: [email protected]
