Azərbaycan, Bakı, 12 noyabr / Trend , müxbir N.İsmayılova/
Azərbaycanın İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidmətinin keçirdiyi növbəti monitorinqlər zamanı istehlak bazarından 730 kiloqramdan çox istifadə müddəti ötmüş ərzaq məhsulları satışdan çıxarılaraq məhv edilib. Bu barədə cümə axşamı nazirlikdən yayılan məlumatda deyilir.
Monitorinqlər Bakının Yasamal, Nəsimi və Xətai rayonlarında, eləcə də Gəncə, Sumqayıt və Xaçmaz şəhərlərində aparılıb.
Mağazalardan istifadə müddəti ötmüş ərzaq məhsulları - kolbasa və qənnadı məmulatları, bitki yağları, süd və süd məhsulları, pivələr, sərinləşdirici içkilər, pivə, çay, kofe, düyü, konservləşdirilmiş məhsullar, uşaq qidaları və s. aşkar olunub, satışdan çıxarılaraq məhv edilib.
Qanun pozuntusuna yol vermiş hüquqi və fiziki şəxslər barəsində inzibati qanun pozuntusuna dair protokollar tərtib edilib.
İstehlak Bazarına Nəzarət üzrə Dövlət Xidməti istehlakçılara ərzaq alarkən onların istehsal tarixlərinə və etiketlərinə diqqət yetirməyi tövsiyə edir.
Ümumiyyətlə, 17 may 2009-cu il tarixindən "Azərbaycan Respublikası İnzibati Xətalar Məcəlləsinə dəyişiklik və əlavələr edilməsi haqqında" Azərbaycan Prezidentinin fərmanından sonra aparılmış nəzarət tədbirləri zamanı qanun pozuntusuna yol verdiyi müəyyən edilmiş 57 hüquqi şəxsə 215,1 min manat, 585 fiziki şəxsə isə 874,3 min manat cərimə tətbiq olunub.
Noyabrın 12-nə olan rəsmi məzənnə 0,8029 AZN/USD təşkil edir.
Məqalə müəllifi ilə əlaqə ünvanı: [email protected]