Azərbaycan, Bakı, 02 mart / Trend , müxbir Ü.İsmayılova/
2010-cu ilin fəaliyyət yekunlarına görə Azərbaycanın sığorta bazarında sığorta şirkətlərinin sayı azala bilər. "Azərqarant" sığorta şirkətinin İdarə Heyətinin sədr müavini Şükür Hüseynov belə hesab edir.
"Haqların həcminin azalması, həmçinin sığorta edənlərin sayının azalması ilə əlaqədar olaraq bazarda davam gətirə bilməyən bəzi şirkətlər bazardan gedə bilər", - Hüseynov deyib.
Onun fikrincə, hazırkı rəqabət şəraitində öz mövqeyini saxlamaq üçün kapitalı vaxtı-vaxtında artıra biməyən şirkətlər də bazardan getmək təhlükəsi ilə üzləşə bilər.
Hüseynov hesab edir ki, 2009-cu ilin fəaliyyət yekunlarına görə, bütün şirkətlər 2008-ci ilin sığorta yığımlarının 50-60 faizini toplaya bilib və 2010-cu ildə şirkətlər bütün lazımi tədbirləri görəcəklər ki, 2008-ci ilin göstəricilərini saxlasınlar.
"Ümumilikdə, bazar portfelinin, həmçinin sövdələşmələrin həcminin ciddi artımı gözlənilmir", - Hüseynov düşünür.
İştirakçının fikrincə, sığorta bazarının vəziyyətinin yaxşılaşmasına, həmçinin Azərbaycanda icbarı sığorta xidmətlərindən istifadə edən yeni iş yerlərinin, həm xarici, həm də yerli transmilli şirkətlərin yaradılması təsir edə bilər. Sığortaçılar üçün bu cür yeni obyektlərin yaradılması bazarda həm ədalətli, həm də ədalətsiz rəqabətin güclənməsinə xidmət edəcək, lakin bazarın ümumi artımına müsbət təsir edəcək.
Azərbaycanda 28 sığorta və bir təkrar sığorta şirkəti fəaliyyət göstərir. 2009-cu ilin yekunları üzrə şirkətlərin tədiyələrinin ümumi həcmi 163,31 milyon manat, ödənişləri 53,07 milyon manat təşkil edir. 2008-ci ildəki fəaliyyətin yekunlarına görə, şirkətlər 179,26 milyon manat məbləğində tədiyə yığıblar, ödənişləri 49,81 milyon manat təşkil edib. Beləliklə, il ərzində şirkətin tədiyələri 8,9 faiz azalıb, ödənişlər 6,5 faiz artıb.
Martın 2-nə olan rəsmi məzənnə 0,8034 AZN/USD təşkil edir.
