...

İİB Azərbaycanda layihələrin implementasiyası prosesinin sürətləndirilməsi üzrə tövsiyələrini təqdim edəcək

Biznes və iqtisadiyyat xəbərləri Materials 10 Mart 2010 16:18 (UTC +04:00)

Azərbaycan, Bakı, 10 mart / Trend , müxbir İ.Xəlilova/

İslam İnkişaf Bankı (İİB) Azərbaycanda layihələrin implementasiyası prosesinin sürətləndirilməsinə yardım göstərmək niyyətindədir.

İİB-nin Azərbaycandakı nümayəndəsi Tamerlan Tağıyev çərşənbə günü deyib ki, Azərbaycanda həyata keçirilən layihələrin icmalı məqsədi ilə bank missiyasının ötən həftə Bakıya səfərinin yekunları üzrə layihələrin vaxtında reallaşmasının təminatına dair tövsiyələrin hazırlanması haqqında qərar qəbul olunub. Missiyaya İİB-nin Mərkəzi Asiya və Avropa ilə əməkdaşlıq şöbəsinin rəisi Hikmət Əliyev rəhbərlik edib.

"Görüş zamanı son vaxtlar layihələrin razılaşdırılması ilə bağlı vəziyyətin yaxşılaşması benefisiarlar tərəfindən qeyd olunub, - Tağıyev deyib. - Bankın Azərbaycan hökuməti ilə əməkdaşlığı tarixində ilk dəfə olaraq, ötən il 800 meqavat gücündə yeni "Cənub" stansiyasının inşası layihəsinin maliyyələşdirilməsinə başlanması üçün bütün prosedurlar qısa müddətdə başa çatdırılıb.

İİB layihənin reallaşmasına 134,4 milyon avro ayırıb.

Bu istiqamətdə irəliləyişə baxmayaraq, həm bank tərəfindən, həm də Azərbaycan tərəfindən layihələrin vaxtında yerinə yetirilməsi ilə bağlı bəzi çətinliklər hələ də qalır. Onların aradan qaldırılması üçün İİB öz təkliflərini təqdim edəcək.

İİB-nin Azərbaycanda əməliyyatlarının həcmi 480 milyon dollar həcmində dəyərləndirilir. Bu vəsait irriqasiya-drenaj sisteminin, yol-nəqliyyat infrastrukturunun, kiçik və orta biznesin inkişafının, məcburi köçkünlərin infrastrukturunun yaxşılaşdırılmasının maliyyələşdirilməsinə yönəlib.

İslam bankı ilə əməkdaşlıq ərzində ən iri kredit ötən il 800 meqavat gücündə yeni "Cənub" stansiyasının (Əli-Bayramlı istilik elektrik stansiyasının yaxınlığında) inşasının maliyyələşdirilməsi üçün təsdiqlənib.

Azərbaycan İslam bankı ilə 1991-ci ildən əməkdaşlıq edir və bankın üzvüdür. Azərbaycan bu beynəlxalq instituta üzv olan ilk postsovet ölkədir. Bankın kapitalında ölkənin iştirak payı 0,11 faiz təşkil edir.

İslam İnkişaf Bankı 1975-ci ildə təsis edilib. Yarandığı vaxtdan bankın kapitalı on beş dəfə artaraq, iki milyard İslam dinarından 30 milyard İslam dinarına (İslam dinarı İİB-nin hesab vahididir və Beynəlxalq Valyuta Fondunun bir xüsusi kredit hüququna ekvivalentdir) çatıb.

Xəbər lenti

Xəbər lenti