Azərbaycan, Bakı, 19 yanvar / Trend /
Yanvar-fevralda Azərbaycanın nəqliyyat sektorunda 28,2 milyon ton müxtəlif növ yük daşınıb. 2009-ci ilin yanvar-fevralında bu göstərici 26,9 milyon ton olub. Bu barədə Dövlət Statistika Komitəsindən deyilib.
Yanvar-fevralda daşınan yüklərin ümumi həcmindən 72 faiz özəl sektorun payına düşür. Yanvar-fevralda yüklərin 46,9 faizi avtomobil nəqliyyatı, 35,2 faizi boru kəmərləri, 11 faizi dəmiryol, 6,9 faizi isə dəniz nəqliyyatı ilə daşınıb.
Sərnişin nəqliyyatında yanvar-fevralda 205,6 milyon nəfər daşınıb ki, bu da ötən ilin müvafiq dövründəki göstəricidən 2,6 faiz çoxdur. Sərnişindaşımanın 85,3 faizi özəl sektorun payına düşür. Sərnişinlərin əsas hissəsi avtomobil nəqliyyatı (84,5 faiz) və metro ilə (14,1 faiz) daşınıb.
Dəmiryolla 3,1 milyon ton müxtəlif növ yük daşınıb. 2009-ci ilin yanvar-fevralında bu rəqəm 3 milyon ton olub.
Dəniz nəqliyyatı ilə 1,9 milyon ton müxtəlif növ yük daşınıb ki, bu da keçən ilin müvafiq dövrü ilə müqayisədə 4,5 faiz çoxdur. Daşınan yüklərin bütün həcmi beynəlxalq əməliyyatların payına düşür. Yanvar-fevralda Azərbaycan limanlarında emal edilmiş yüklərin həcmi 1,5 milyon ton təşkil edib.
Avtonəqliyyatla 13,2 milyon ton yük daşınıb ki, bu da 2009-ci ilin yanvar-fevralındakı göstəricidən 6,5 faiz çoxdur. Sərnişindaşımanın həcmi 175,6 milyon nəfər (7,2 faiz çoxalıb) təşkil edib. Sərnişinlərin 96,8 faizi avtobuslar, 3,2 faizi isə minik avtomobilləri ilə daşınıb.
Metropolitenlə sərnişindaşımanın həcmi 18,4 faiz azalaraq 29 milyon nəfər təşkil edib.
Yanvar-fevralda hava nəqliyyatı ilə 114,7 min sərnişin daşınıb. 2009-ci ilin yanvar-fevralında il bu rəqəm 167,8 min nəfər olub. Bu növdə daşınmanın 29,4 faizi özəl sektorun payına düşüb.
Avrasiya nəqliyyat dəhlizi üzrə Azərbaycan ərazisi vasitəsilə cari ilin yanvarda 4,1 milyon ton yük daşınıb ki, bu da ötən ilin analoji dövründəki göstəricidən 9,5 faiz çoxdur. Dəhliz çərçivəsində yanvarda 18,5 milyon sərnişin daşınıb ki, bu da 2009-cu ilin yanvarında olan göstəricidən 7,6 faiz çoxdur.
