Azərbaycan, Bakı, 4 may /Trend, müxbir E.İsmayılov/
Azərbaycanın Nəqliyyat Nazirliyi Koreyanın İnçxon şəhərində BMT-nin Asiya və Sakit okean üzrə iqtisadi və sosial komissiyasının (UNESCAP) 66-cı sessiyasının birinci mərhələsində iştirak edəcək. Bu barədə nazirliyin çərşənbə axşamı yayılan məlumatında deyilir.
Sessiya iki mərhələdə keçiriləcək (birinci mərhələ - 13-15 may). Sessiyanın bu mərhələsində yüksəkvəzifəli şəxslər iştirak edəcəklər. Mayın 17-19-da ikinci mərhələ nazirlər səviyyəsində keçiriləcək.
Azərbaycanın Nəqliyyat Nazirliyi sessiyanın yalnız birinci mərhələsində iştirak edəcək. O, burada nəqliyyat siyasəti və iqtisadiyyatı şöbələrinin rəhbərləri ilə təmsil olunacaq.
Sessiya çərçivəsində maliyyə sisteminin təşviq edilməsi və Asiya-Sakit okeanı regionunun ekoloji vəziyyəti baxımından davamlı iqtisadi inkişaf məsələlərinə baxılacaq və müzakirə olunacaq. Həmçinin, sessiyanın gündəliyinə makroiqtisadi siyasət, yoxsulluğun azaldılması, ticarət və sərmayə, informasiya və kommunikasiya texnologiyası, ətraf mühit, sosial inkişaf və təbii fəlakətlərin riskinin azaldılması məsələləri daxil edilib.
