Azərbaycan, Bakı, 11 iyun /Trend, müxbir İ.Xəlilova/
Azərbaycan xarici bazarlarda yerləşdiriləcək sərmayə fondları aktivlərinin strukturunda məhdudiyyətlər qoymaq fikrindədir. Bunu Azərbaycanın Qiymətli Kağızlar üzrə Dövlət Komitəsinin sədri Rüfət Aslanlı deyib.
"Sərmayə fondlarının aktivlərinin strukturu xüsusi işlənib hazırlanmış normativ aktlarda öz əksini tapacaq. Bu aktlarda onların Azərbaycan xaricində diversifikasiyası üzrə tələblər irəli sürüləcək", - o bildirib.
"Sərmayə fondları haqqında" qanun layihəsinə əsasən, fondlar öz vəsaitlərini müxtəlif maliyyə aktivlərində - aksiyalarda, borc vasitələrində yerləşdirə bilər.
Yeni qanunda (birinci qanun 1999-cu ildə qəbul edilib) Azərbaycanda səhmdar pay sərmayə fondları, həmçinin intervallı paya malik olan açıq və qapalı pay sərmayə fondlarının yaradılması nəzərdə tutulur. Sərmayə fondlarının fəaliyyəti Azərbaycanın Qiymətli Kağızlar üzrə Dövlət Komitəsi tərəfindən lisenziyalaşdırılacaq.
