Azərbaycan, Bakı, 16 iyun /Trend, müxbir N.İsmayılova/
Azərbaycan Mərkəzi Bankının (AMB) açıqladığı ödəniş balansına görə, 2010-cu ilin yanvar-mart aylarında ölkənin ödəniş balansında cari əməliyyatların hesab profisiti ötən ilin analoji dövründəki 1,8 milyard dollara qarşı 3,9 milyard dollar təşkil edib. Bu barədə çərşənbə günü AMB-dən məlumat verilib. Profisitin həcmi 2,2 dəfə artıb.
Neft-qaz sektoru üzrə 4,7 milyard dollarlıq cari hesab profisiti qeyri-neft sektoru üzrə 0,8 milyard dollar təşkil edən cari hesab kəsirini tam ödəməyə imkan verib. Neft-qaz sektorundan daxilolmalar əsasən neft və təbii qaz ixracının və bu sektora cəlb edilən xarici kapitalın hesabına formalaşır. Bu sektor üzrə ödənişlər mənfəətin alınması və investisiyaların repatriasiyası, avadanlıq idxalı və xidmət nəticəsində həyata keçirilir. Cari ilin birinci rübündə neft-qaz sektoru üzrə müsbət saldo 4,8 milyard dollar təşkil edib.
2010-cu ilin yanvar-mart aylarında xarici ticarət dövriyyəsinin ümumi həcmi 7,5 milyard dollar, xarici ticarət balansında müsbət saldo 5 milyard dollar təşkil edib. Mal idxalı 1,22 milyard dollar, ixrac əməliyyatları isə 6,26 milyard dollar təşkil edib.
Hesabat dövründə 110 ölkə ilə ticari münasibətlər qurulub. Ticarət dövriyyəsindən 11,5 faiz MDB ölkələri ilə, 88,5 faiz digər ölkələrlə əməliyyatların payına düşüb. İtaliya, ABŞ, Fransa, İsrail, Türkiyə, Rusiya, Hindistan, Xorvatiya və Ukrayna ilə intensiv ticarət münasibətləri yaradılıb. Azərbaycanın ixrac-idxal əməliyyatlarının 75 faizi bu ölkələrin payına düşür.
