Azərbaycan, Bakı, 2 iyul /Trend, müxbir E.İsmayılova/
Dağıstan ərazisində Manas Açi dəmiryol məntəqəsində baş verən partlayış Azərbaycandan Rusiya və geriyə hərəkət edən qatarların hərəkətinə təsir göstərməyib. Bu barədə cümə günü "Azərbaycan Dəmir Yolları" QSC-nin mətbuat xidmətinin rəhbəri Nadir Əzməmmədov bildirib.
Onun sözlərinə görə, partlayış Moskva vaxtı ilə saat 05:20-də baş verib. Bakı vaxtı ilə saat 06:20-də isə Bakıdan Bakı-Tümen sərnişin qatarı yola salınıb. Bundan başqa, qrafikə uyğun olaraq, saat 19:50-də Bakı-Moskva sərnişin qatarı da yola salınacaq.
"Baş verən partlayış qatarların yola salınmasına təsir etməyib. Əks tərəf bizə Dağıstan ərazisində baş verə biləcək mümkün yubanmalar haqqında hələ ki məlumat verməyib", - Əzməmmədov qeyd edib.
RİA Novosti agentliyinin verdiyi xəbərə görə, Dağıstan ərazisində baş verən partlayış Bakı-Xarkov qatarının Dərbənd stansiyasında yubanmasına (30 dəqiqə) səbəb olub.
Dağıstanın Qarabudağkənd rayonundakı Manas Açi dəmiryol məntəqəsində baş verən partlayış nəticəsində relsdən 12 vaqon çıxıb ki, bunlardan da 7-si çevrilib. Qarabudağkənd RPŞ-nin nümayəndəsi bildirib ki, hadisə zamanı maşinist və onun köməkçisi xəsarət alıb.