Azərbaycan, Bakı, 3 avqust /Trend, müxbir E.İsmayılov/
Bakı-Tbilisi-Qars dəmiryol marşrutunun açılması üzrə işlərin başa çatdırılması 2012-ci ilin birinci yarısına planlaşdırılıb. Bu barədə Azərbaycanın nəqliyyat naziri Ziya Məmmədov layihə üzrə koordinasiya şurasının Bakıda keçirilən iclası zamanı deyib.
Onun sözlərinə görə, layihənin həyata keçirilməsi ilə bağlı əvvəllər razılaşdırılmış müddətə baxmayaraq, tərəflər prosesin tezləşdirilməsi və işlərin çox hissəsinin 2011-ci ilin sonunadək başa çatdırılması üzərində işləyirlər.
Ən mürəkkəb proseslərdən biri dağlıq ərazidən keçəcək Gürcüstan və Türkiyə arasında tunelin salınması hesab olunur. Bu tunelin uzunluğu 4,5 km təşkil edəcək.
Koordinasiya şurasının iclası zamanı tərəflər bu ilin sonunadək həm yeni dəmiryol hissəsinin, həm də Gürcüstanda 160 kilometrlik dəmiryol hissəsinin təmir-bərpası üzrə işlərin 50 faizinin başa çatdırılacağını bəyan ediblər. Məmmədovun sözlərinə görə, bu yaxınlarda Türkiyə ərazisində işləri tezləşdirmək məqsədilə 25 ədəd yeni texnika çatdırılıb.
"Dəhlizin ən yüksək buraxılış qabiliyyəti 17 milyon ton təşkil edəcək. İlkin mərhələdə bu göstərici 1 milyon sərnişin və 6,5 milyon ton yük təşkil edəcək", - Türkiyənin nəqliyyat naziri Bineli Yıldırım deyib.
Onun sözlərinə görə, 2030-cu ilədək bu dəhliz çərçivəsində yükdaşımaların həcminin üç dəfə artırılacağı proqnozlaşdırılır. Türkiyə ərazisində layihənin həyata keçirilməsi çərçivəsində görüləcək işlərin 34 faizi artıq yerinə yetirilib. Cari ilin sonunadək bu göstəricinin 66 faizə çatdırılması planlaşdırılıb.
Bakı-Tbilisi-Qars layihəsi çərçivəsində 76 km Türkiyə ərazisindən, 29 km isə Gürcüstan ərazisindən keçən yeni 105 kilometrlik dəmiryol magistralının tikintisi planlaşdırılır. Bundan əlavə, Gürcüstanda yükötürmə qabiliyyətinin ildə 15 milyon tonadək artırılması üçün 183 kilometrlik Axalkalaki-Marabda-Tbilisi dəmiryol məntəqəsi bərpa ediləcək. Həmçinin, Axalkalakidə Gürcüstanda olan dəmir yolundan qatarların Avropaya keçməsi üçün məntəqənin inşa edilməsi planlaşdırılır.
