Azərbaycan, Bakı, 7 avqust /Trend, müxbir N.İsmayılova/
İlin əvvəlindən milli banklararası iri ödənişlər sistemi (AZİPS) vasitəsilə ödəmələrin həcmi 6,78 mlrd manat həcmində maksimum göstəriciyə çataraq, 53,4 faiz və ya 2,4 mlrd manatadək artıb, - Azərbaycan Mərkəzi Bankından bildiriblər. İyulda bu sistem vasitəsilə ödəmələrin həcmi 15,2 faiz və ya 0,9 mlrd manat təşkil edib. İyunda bu sistem vasitəsilə ödəmələrin həcmi 5,89 mlrd manat olub.
İyulda kiçik ödənişlərin klirinq ödəmə sistemi (XONKS) vasitəsilə əməliyyatların həcmi 19,5 faiz artaraq 630 mln manat təşkil edib. İyunda bu göstərici 527 mln manata çatıb.
İlin əvvəlindən XONKS sistemi üzrə ödəmələrin maksimal həcmi iyulda olub və 66,2 faiz artıb.
Hesabat dövrü ərzində AZİPS sistemi vasitəsilə 33 min ödəmə həyata keçirilib ki, bu da iyun ayının göstəricisindən 3 faiz çoxdur. XONKS sistemi vasitəsilə isə 913 min ödəmə həyata keçirilib ki, bu da iyun göstəricisindən 2,7 faiz çoxdur.
İyulda AZİPS sistemi istifadəçilərinin sayı 49, XONKS ödəmə sistemi istifadəçilərinin sayı isə 53-ə bərabər olub.
AMB-nin xırda (XONKS) və iri (AZIPS) ödəmələr üzrə milli ödənişlər sistemi 2005-07-ci illərdə milli ödəniş sistemlərinin inkişafı üzrə Dövlət Proqramı çərçivəsində yaradılıb. XONKS bazasında kommunal ödənişlər üzrə mərkəz yaradılıb ki, bu mərkəz on-line rejimində vəsait köçürmək və hesabat əldə etməyə imkan verir. Bunun da nəticəsində ayrı-ayrı banklar tərəfindən sui-istifadə halları aradan qaldırılır.
Avqustun 7-nə rəsmi məzənnə 0,8034 AZN/USD təşkil edir.
