Azərbaycan, Bakı, 25 avqust /Trend, müxbir S.Süleymanov/
Tatarıstan və Başqırdıstan bu il Qazaxıstandan böyük həcmdə taxıl almaq niyyətindədirlər, belə ki, bu bölgələr quraqlıqdan çox ziyan çəkiblər. Bu barədə Trend-ə müsahibəsində Qazaxıstan Kənd Təsərrüfatı Nazirliyinin əkinçilik departamentinin direktoru Anna Bus bildirib.
"Biz artıq Başqırdıstandan onların bizdən taxıl almaq istəkləri ilə bağlı məktub almışıq. Rusiyanın kənd təsərrüfatı nazirinin müavini Aleksandr Belyayevlə bizm nazir müavini Saktaş Həsənov arasında telefon danışığı da olub. Telefon danışığı zamanı Tatarıstanın Qazaxıstan taxılını alması məsələsi ilə bağlı məsələ müzakirə edilib", - Bus deyib.
Onun məlumatına görə, Qazaxıstan taxılının böyük həcmdə alışı ilə bağlı məsələ Tatarıstan rəhbərliyinin Astanaya qarşıdan gələn səfəri zamanı müzakirə ediləcək.
Bundan başqa, Bus xatırladıb ki, Rusiyanın ən böyük taxıl istehsalçısı olmasına baxmayaraq, Qazaxıstan taxılının qonşu ölkəyə tədarükünün həcmi 2007-ci ilədək ənənəvi olaraq ildə 1,5 milyondan 2 milyonadək təşkil edib.
Onun sözlərinə görə, Qazaxıstan taxılının alıcıları əsasən Rusiyanın Asiya regionları - Çelyabinsk və Omsk vilayətləri, eləcə də böyük meqapolis Moskva olub.
"Moskva hökuməti paytaxtın lazımi həcmdə yerli taxılla təchiz edilməsinə baxmayaraq, hər il 300 min tona yaxın Qazaxıstan taxılı alır", - Bus qeyd edib.
Bundan əvvəl "Prodkorporasiya" SC-nin kommersiya məsələləri üzrə direktoru Daulet Uvaşevin verdiyi məlumata əsasən, indiki marketinq ilində Qazaxıstan ixracda, Əfqanıstan və Cənubi Qafqaz daxil olmaqla, Orta Asiya respublikalarına böyük diqqət yetirmək niyyətindədir.
Uvaşevin məlumatına görə, Bu il Azərbaycanın taxıl tələbatı 1,2-1,3 milyon, Gürcüstanın isə təxminən 800 min tondur. Bu həcmi Qazaxıstan qonşu Rusiya və Ukraynadan tədarük məhdudlaşacağı təqdirdə sakitcə ödəyə bilər.
Bundan əvvəl verilən məlumata görə, cari marketinq ilində Qazaxıstanın ixrac potensialı 8 milyon ton taxıl təşkil edəcək. Gözlənilən məhsuldarlıq, ötənilki məhsulun qalığı nəzərə alınmaqla, 14-15 milyon səviyyəsində olacaq.