...

Azərbaycan dövlət büdcəsindən 2010-cu ildə sosial ödənişlərin maliyyələşməsinə əlavə olaraq 122 milyon manat ayrılacaq

Biznes və iqtisadiyyat xəbərləri Materials 29 Sentyabr 2010 20:03 (UTC +04:00)

Azərbaycan, Bakı, 29 sentyabr /Trend, müxbirlər İ.Xəlilova, E.İsmayılov/

Azərbaycan Prezidenti İlham Əliyevin dövlət idarələrinin əməkdaşlarının aylıq əməkhaqlarının, əməkhaqqının baza hissəsinin və əmək pensiyasının minimum məbləğinin artırılması haqqında sərəncamının yerinə yetirilməsi məqsədilə Maliyyə Nazirliyi cari ilin sentyabr-dekabr ayları ərzində bu xərclərin ödənilməsi üçün 122 milyon manatın əlavə olaraq dövlət büdcəsindən ayırılmasını təmin edəcək. Bu barədə çərşənbə günü ölkənin maliyyə naziri Samir Şərifov deyib. Minimum əməkhaqqı və əmək pensiyasının baza hissəsi 75 manatdan 85 manatadək artırılıb.

"Azərbaycan Prezidenti İlham Əliyev bu günlərdə bir sıra dövlət idarələrinin əməkdaşlarının aylıq əməkhaqlarının orta hesabla 10 faiz artırılması haqqında sərəncam imzalayıb ki, bu da çox əhəmiyyətli addımdır. Azərbaycanın dövlət büdcəsi sosial yönümlüdür və buna görə də ilk növbədə sosial öhdəliklər yerinə yetiriləcək", - Şərifov bildirib.

Nazirin sözlərinə görə, 2008-2009-cu illlərdə dünya maliyyə böhranı dünyanın bütün ölkələrinin iqtisadiyyatına mənfi təsiri göstərib və Azərbaycan da istisna olmayıb, amma buna baxmayaraq, 2009-cu ildə ölkədə yüksək iqtisadi artım templəri müşahidə olunub və həmin templər bu il də qorunur.

"2008-2009-cu illərdə başqa ölkələrdə əks proses - ÜDM-in azalması müşahidə olunub və indi onlara ÜDM-i böhrandan əvvəlki səviyyəyə çatdırmaq üçün minimum 3-4 il, bəzilərinə isə hətta beş il lazım olacaq. Buna görə də indi aralarında Avropa İttifaqının inkişaf etmiş ölkələrinin də olduğu bir sıra ölkələr ilk növbədə büdcənin defisitini, onun xərclərini, əməkhaqlarının, pensiya ödəmələrinin azaldılması çərçivəsində çox sərt maliyyə siyasətini reallaşdırırlar", - Şərifov bildirib.

Onun sözlərinə görə, Azərbaycan onlardan fərqli olaraq, 2010-cu ildə əməkhaqqının məbləğini artırıb. Prezident sərəncamına əsasən, bu artımın maliyyə təminatı artıq Maliyyə Nazirliyi tərəfindən aparılıb və sosial ödəmələrin əlavə maliyyələşməsi ölkənin Nazirlər Kabinetinin təsdiq etdiyi vahid tarif qrafiki üzrə həyata keçiriləcək.

"Artıq bu ayın nəticələrinə görə büdcə təşkilatlarının işçilərinə əməkhaqqı, əmək pensiyası artımla ödəniləcək. Cari ilin dekabrına qədər dövlət büdcəsindən bütün bu tədbirlərin maliyyələşməsinə 122 milyon manat ayırılacaq", - Şərifov qeyd edib.

Onun sözlərinə görə, əməkhaqqının artımı 600 min Azərbaycan vətəndaşının maliyyə rifahını yaxşılaşdıracaq.

Nazir həmçinin qeyd edib ki, ölkədə keçirilən sosial tədbirlərə məcburi köçkünlərin qidalanmasına xərclərin artması, ali məktəb, peşə-texniki məktəbləri, magistr və aspirantlar üçün təqaüdlər də aiddir. Ən əhəmiyyətli artım şəhid ailələrinə verilən maddi yardımlar üzrə (50 faiz) olub.

"2010-cu ildə bütün bu sosial tədbirlərin reallaşdırılması tamamilə maliyyələşdiriləcək", - Şərifov qeyd edib.

Sentyabrın 29-na olan rəsmi məznnə 0, 8027 AZN/USD təşkil edir.

Xəbər lenti

Xəbər lenti