Azərbaycan, Bakı, 7 oktyabr /Trend, müxbir İ.Xəlilova/
Parlamentin Elm və təhsil, Mədəniyyət, Regional məsələlər komitələri cümə axşamı birgə iclasda Azərbaycanın 2011-ci il üçün dövlət büdcəsini bəyəniblər və sənədin baxılması üçün Milli Məclisə təqdim olumasını tövsiyə ediblər. İclasda Elm və təhsil komitəsinin sədri Şəmsəddin Hacıyevin dediyinə görə, dövlət büdcəsinin proqnozları ölkədəki sosial-iqtisadi vəziyyətə uyğun olaraq və dünyadakı iqtisadi proseslər nəzərə alınmaqla tərtib olunub ki, bu da gələcəkdə Azərbaycan iqtisadiyyatının dinamik inkişafını qorumağa imkan verəcək.
"Azərbaycanda artıq büdcə institutu formalaşıb və büdcə proqnozlarının formalaşdırılması prosesində bütün dövlət qurumları iştirak edirlər", - Hacıyev qeyd edib.
Onun sözlərinə görə, Azərbaycan dövlətinin iqtisadi gücünü o fakt sübut edir ki, Azərbaycan büdcəsinin gəlirləri (15 milyard dollardan çox) Gürcüstan büdcəsini dörd dəfədən çox (3,6 milyard dollar), Ermənistan büdcəsini isə altı dəfədən çox (2,4 milyard dollar) üstələyir. Azərbaycanın dövlət xərcləri (15,9 milyard dollar səviyyəsində proqnozlaşdırılır) Gürcüstanın büdcə xərclərini 4,2 dəfə (3,8 milyard dollar), Ermənistanın büdcə xərclərini isə 5,7 dəfə (2,8 milyard dollar) üstələyir.
"Beləliklə, Azərbaycan regional iqtisadi mərkəzə çevrilir", - Hacıyev vurğulayıb.
Maliyyə Nazirliyinin sosial sahələrin maliyyələşdirilməsi şöbəsinin rəisi Xaqani Rzayevin sözlərinə görə, 2011-ci il üçün dövlət büdcəsinin xərclər strukturunda büdcə vəsaitlərinin ünvanlılığının və effektiv xərclənməsinin təmini üzrə tərtib, icra və işlərin görülməsi prosesi təkmilləşdirilib.
Büdcə proqnozları formalaşdırılan zaman gələn ilə olan makroiqtisadi proqnozlar, xüsusilə, ÜDM-in 3,8 faiz səviyyəsində artım tempi və qeyri-neft ÜDM-nin 7,2 faiz səviyyəsində artım tempi nəzərə alınıb.
2011-ci il üçün dövlət büdcəsinin gəlirləri ÜDM-dən 30 faiz və ya 2010-cu ilin proqnozu ilə müqayisədə 4,8 faiz artımla 12,061 milyard manat səviyyəsində proqnozlaşdırılır. Dövlət büdcəsinin xərc hissəsi ÜDM-dən 31,7 faiz həcmində proqnozlaşdırılır. Büdcə kəsirinin ödənilmə mənbələri nəzərə alınmaqla, xərclər cari ilin proqnozuna nisbətdə 3,9 faiz artacaq və 12,748 milyard manat təşkil edəcək.
Məqsədyönlü dövlət proqram və tədbirlərinin maliyyələşdirilməsi üçün 5,390 milyard manat xərclənməsi nəzərdə tutulub ki, bu da xərclərin 42,3 faizini təşkil edir.
Ümumi büdcə xərclərində sosial yönümlü xərclərin xüsusi çəkisi 2010-cu ilin proqnozlarına nisbətdə 8,8 faiz artaraq, 33,3 faiz və ya 4234 milyon manat səviyyəsində proqnozlaşdırılır.
"2010-cu ildə əhalinin sosial müdafiəsinin gücləndirilməsi və sosial təminatının yaxşılaşdırılması üçün büdcə təşkilatları işçilərinin əməkhaqlarının, əmək pensiyasının baza hissəsinin və digər sosial müavinətlərin artırılması haqqında qərar qəbul edilib. Bununla əlaqədar gələn ilin dövlət büdcəsində üç milyon nəfərin təmin olunması üçün vəsaitlər nəzərdə tutulub", - Rzayev qeyd edib.
Elm, təhsil, səhiyyə, mədəniyyət, bədən tərbiyəsi və gənclər siyasəti, sosial müdafiə və təminat sahələrində tədbirlərin maliyyələşdirilməsi üçün 3518 milyon manat ayrılması nəzərdə tutulur ki, bu da 2010-cu ilin proqnozundan 7,5 faiz çoxdur. Bütün bu xərclərin xüsusi çəkisi 2010-cu illə müqayisədə 1,1 faiz artaraq, dövlət büdcəsinin ümumi xərclərinin 27,7 faizinə çatacaq.
"2011-ci ildə ilk dəfə olaraq dövlət büdcəsində ali təhsil sistemində yeni maliyyələşmə mexanizminin tətbiqi ilə bağlı xərclər nəzərdə tutulub", - Rzayev qeyd edib.
Gələn il üçün dövlət büdcəsinin kəsiri 687 milyon manat və ya ÜDM-in 1,7 faizi məbləğində proqnozlaşdırılır ki, bu da 2010-cu ilin proqnozundan 0,3 faiz azdır.
Oktyabrın 7-nə olan rəsmi məznnə 0,8021 AZN/USD təşkil edir.
