Azərbaycan, Bakı, 3 noyabr /Trend, müxbir A.Axundov/
Fransanın böyük sığorta şirkəti "AXA Group"un gəlişi Azərbaycanda sığorta bazarına mənfi təsir göstərməməlidir. Bu barədə çərşənbə günü Azərbaycan Sığortaçılar Assosiasiyasının (ASA) Müşahidəçilər Şurasının və "Atəşgah Sığorta" şirkətinin idarə heyətinin sədri Azər Əliyev deyib.
"İndi bu şirkətin bazara nə dərəcədə təsir göstərəcəyi barədə nəsə demək çətindir. Lakin istənilən halda mənfi təsir göstərməyəcək. Xarici şirkətin gəlməsi müsbət təcrübədir. Biz onlardan çox şey öyrənə bilərik", - Əliyev qeyd edib.
Onun sözlərinə görə, "AXA"nın Azərbaycanın sığorta bazarında inhisarçı olacağı təhlükəsi yoxdur.
Fransanın "AXA Group" Sığorta Şirkəti Azərbaycanın "MBASK" sığorta şirkətinin nəzarət-səhm paketini alıb. Nəzarət-səhm paketi "AXA Group"un törəmə şirkəti - İspaniyanın "AXA Seguros Generales" şirkəti tərəfindən Avropa Yenidənqurma və İnkişaf Bankına (AYİB) və "MBASK"ın kapitalında payını almaq hesabına əldə edilib. Qeyd edək ki, "MBASK"ın səhmlərinin 30 faizi AYİB-ə, 70 faizi isə şirkətin əsas səhmdarı Eldar Qəribova məxsusdur. Qəribova yerdə qalan 49 faiz pay məxsus olacaq.
"AXA" şirkəti həyat, sağlamlıq, əmanət sığortası, beynəlxalq və təkrar sığorta, maliyyə resurslarının idarəsi və s. üzrə xidmətlər göstərir. Əsası 1816-cı ildə qoyulmuş şirkətin mənzil-qərargahı Parisdə yerləşir. "AXA"da 216 095 işçi çalışır, bütün dünya üzrə 96 milyon müştərisi var. "Fortune" jurnalının məlumatlarına görə, "AXA" dünyanın 500 iri şirkətinin siyahısında doqquzuncu yeri tutur.
Azərbaycanda 27 sığorta və bir təkrar sığorta şirkəti fəaliyyət göstərir. Hazırda ölkədə xarici kapitalın iştirakı ilə beş sığorta şirkəti fəaliyyət göstərir.
