Azərbaycan, Bakı, 18 noyabr /Trend, müxbir N.İsmayılova/
Avropa Yenidənqurma və İnkişaf Bankı (AYİB) Azərbaycanda yeganə dövlət bankı Azərbaycan Beynəlxalq Bankının (AMB) özəlləşdirilməsinə ehtiyac olduğunu hesab edir. Bu barədə cümə axşamı strukturun saytında dərc edilən "Keçid iqtisadiyyatı haqqında - Bərpa və islahatlar" (Transition report 2010 "Recovery and Reform") məruzəsində deyilir.
"Maliyyə sektoru böhrandan itkisiz çıxmasına baxmayaraq, xeyli islahatlar tələb edir. Ölkənin bank sektorunda dövlət bankı üstünlük təşkil edir və çoxlu sayda kiçik özəl bankların olması ilə bu sektor fraqmentli və qeyri-effektivdir", - hesabatda deyilir.
Sənəddə bildirildiyinə görə, islahatlar ölkənin bank bazarında rəqabətin güclənməsi sayəsində bank sektorunun möhkəmlənməsinə və modernləşdirilmsinə xidmət etməlidir.
"Hakimiyyət bank sektorunun möhkəmlənməsi və bank olmayan sektorun gələcək inkişafı üzrə tədbirlər planlaşdırır. Dünya maliyyə böhranı zamanı dövlətin sığortaladığı depozitlərin məbləğinin artırılması kimi tədbirlərə əlavə olaraq, hökumət bank nəzarətinin yaxşılaşdırılması üzərində işləyir və dövlətə məxsus Azərbaycan Beynəlxalq Bankının özəlləşdirilməsi məsələsini müzakirə edir", - hesabatda qeyd edilib.
Məlumata əsasən, dövlət şirkətləri sənayenin əksər sahələrində, o cümlədən, neft-qaz sektorunda, enerji sahəsində, telekommunikasiya sektorunda üstünlük təşkil edir.
"Maliyyə sektorunun dərinləşməsinə dəstək üçün sektorda idarəetməni yaxşılaşdırmaq, möhkəmlənməni həvəsləndirmək lazım olacaq və eyni zamanda bazara beynəlxalq strateji bank qruplarının çıxması da stimullaşdırılmalıdır", - hesabatda vurğulanıb.
AYİB ekspertləri hesab edirlər ki, Azərbaycanın Ümumdünya Ticarət Təşkilatına daxil olması üzrə danışıqların başa çatması böyük əhəmiyyətə malikdir, belə ki, bu, qeyri-neft ixracı sahəsinin inkişafına xidmət edəcək. Bundan başqa, gömrük rejiminin təkmilləşdirilməsinə də ehtiayc duyulur.
2009-cu ildə AYİB Azərbaycanda doqquz layihəyə, orta hesabla 232 milyon dollar sərmayə yatırıb. AYİB 2010-cu ildə Azərbaycanda 15 layihəni maliyyələşdirib.
AYİB Azərbaycanda, ümumilikdə, 114 layihənin həyata keçirilməsinə 1,05 milyard avro investisiya qoyub. Onlar üçün, orta hesabla, 5,6 milyard avro maliyyələşdirmənin cəlb edilməsi təşkil olunub. Hazırda AYİB-in cari portfeli 663 milyon avro təşkil edir. Onun 69 faizindən artıq istifadə olunub. Bununla yanaşı, istifadə edilən kreditlərdən 283,4 milyon avro ödənilib.
AYİB vəsaitləri Mərkəzi Avropa və Mərkəzi Asiyanın 30 ölkəsində bazar iqtisadiyyatı və demokratiyanın qurulması məqsədilə istifadə olunan bankdır. Onun sahibi 61 ölkə və iki beynəlxalq təşkilatdır.
